बापू सोळुंके
छत्रपती संभाजीनगर : पती आणि मुलांचे अपहरण करून त्यांना जिवे मारण्याची धमकी देत शहर राष्ट्रवादी काँग्रेस उपाध्यक्ष असलेल्या एका नराधमाने विवाहितेवर अत्याचार केल्याचा प्रकार उघड झाला आहे. १२ मार्च रोजी टाऊन हॉल, नूर कॉलनीत ही घटना घडली होती.
या प्रकाराची तिने वाच्यता करू नये, म्हणून आरोपीने तिची एक अश्लील व्हिडिओ क्लीप बनविली होती. ही व्हिडिओ क्लीप सोशल मीडियावर व्हायरल करण्याची धमकीही त्याने दिली होती. याविषयी सिटी चाैक पोलीस ठाण्यात आरोपीविरोधात बलात्कार आणि जिवे मारण्याची धमकी दिल्याचा गुन्हा पोलिसांनी नोंदविला. मुख्तार खान ऊर्फ बब्बू (४२ ,रा. नूर कॉलनी, टाऊन हॉल) असे आरोपीचे नाव आहे.
राष्ट्रवादी काँग्रेसचा पदाधिकारी आणि सामाजिक कार्यकर्ता म्हणून मुख्तार ऊर्फ बब्बू खान वावरत असतो. शहरात पती आणि दोन लेकरांसह राहणाऱ्या पीडितेवर त्याची मार्च महिन्यात नजर पडली. तेव्हा तो तिचा पाठलाग करीत तिच्या घरापर्यंत जाऊ लागला. तिला पाहून अश्लील इशारे करू लागला. पीडिता दवाखान्यात अथवा अन्य कोठे जाण्यासाठी घराबाहेर पडल्यानंतर तो तिला गाठून तिची मुले आणि पतीचे अपहरण करून त्यांना जिवे मारण्याची तसेच तिचा संसार उद्ध्वस्त करण्याची धमकी देत असे.
१२ मार्च रोजी त्याने तिला अशाच धमक्या देऊन त्याच्या टाऊन हॉल येथील घरी बोलावले. तेथे तिला गुंगीचे औषध टाकलेले पाणी दिले. हे पाणी पिऊन ती बेशुद्ध पडल्यानंतर त्याने तिच्यावर नैसर्गिक आणि अनैसर्गिक अत्याचार करून त्याच्या मोबाईलवर आक्षेपार्ह व्हिडिओ क्लीप बनविली. हा प्रकार कोणाला सांगितल्यास ही व्हिडिओ क्लीप समाजमाध्यमावर व्हायरल करून बदनामी करण्याची धमकी त्याने दिली.
नातेवाईकांनी धीर दिल्याने पोलिसांत धाव
यामुळे पीडिता प्रचंड घाबरली होती. घटनेपासून ती मानसिकदृष्ट्या खचली होती. नातेवाईकांनी तिला विश्वासात घेऊन विचारल्यानंतर बब्बू खानने केलेल्या अत्याचाराची माहिती तिने दिली. त्याच्या धमक्यांना न घाबरता त्यांनी शनिवारी रात्री सिटी चौक पोलीस ठाण्यात तक्रार दिली. पोलिसांनी गुन्हा नोंदविला. पोलीस निरीक्षक विठ्ठल पोटे यांच्या मार्गदर्शनाखाली उपनिरीक्षक मुक्तेश्वर लाड तपास करीत आहेत.