छत्रपती संभाजीनगर : रिक्षाचालकाने प्रवासी तरुणीला अश्लील प्रश्न विचारल्याची घटना ताजी असताना पुन्हा एका रिक्षाचालकाने दोन तरुणींचा पाठलाग करून ‘रिक्षात बसते का,’ अशी विचारणा केली. बुधवारी मध्यरात्री तरुणी मैत्रिणीसह बाबा चौकाच्या दिशेने जात असताना ही घटना घडली. याप्रकरणी क्रांती चौक पोलिसांनी चालक इम्रान खान सलीम खान (३५, रा. आमखास मैदान परिसर) याला शुक्रवारी सायंकाळी ताब्यात घेतले.
रोजाबागमध्ये राहणारी ३१ वर्षीय तरुणी १३ जुलै रोजी मध्यरात्री दोन वाजता मैत्रिणीसह मोपेडवर दुचाकीवरून बाबा चौकाकडे पेट्रोल भरण्यासाठी जात होती. आमखास मैदानाजवळून रिक्षाचालकाने दोघींचा पाठलाग सुरू केला. एसटी विभागीय कार्यालयाच्या परिसरात अंधारात तिच्या दुचाकीसमोर रिक्षा आडवी उभी करून त्याने लगट करण्याचा प्रयत्न करत ‘चल रिक्षा में बैठ’ असे धमकावले. रिक्षात बसलेला दुसरा तरुण खाली उतरताच तरुणींनी मोबाइल काढत ‘पोलिसांना फोन करते’ म्हणत आरडाओरड सुरू केली. त्यामुळे दोघांनी पोबारा केला. सकाळी सहा वाजता तरुणीने मित्रासोबत क्रांती चौक ठाण्यात तक्रार दाखल केली.
रिक्षाचालकाचा अजब जबाबनिरीक्षक संतोष पाटील यांनी तत्काळ डीबी पथकाला तपासाचे आदेश दिले. सीसीटीव्ही कॅमेऱ्यात आमखासपासून चालक तरुणींचा पाठलाग करत असल्याचे दिसते. पोलिसांनी तपास करून इम्रानला शुक्रवारी ताब्यात घेतले. चौकशीत मात्र त्याने अजब जबाब दिला. ओळखीच्या साजिदच्या सांगण्यावरून दुचाकीवर त्याची बहीण आहे, ती कुठे जात आहे, हे पाहायला आम्ही निघालो होतो, असे सांगितले; परंतु, आम्ही त्यांना थांबवताच दिसले की, ती साजिदची बहीण नव्हती. तरुणींनी आमच्या कानशिलात लगावली. घाबरून आम्ही निघत असताना आमची पुढे रिक्षादेखील उलटली, असे सांगितले. तरुणीने मात्र साजिद नावाच्या कुठल्याच तरुणाला ओळखत नसल्याचे स्पष्ट केले. साजिदचा शोध सुरू आहे. त्याला ताब्यात घेतल्यानंतर नेमका प्रकार स्पष्ट होईल, असे पाटील यांनी सांगितले.