वैजापुर (औरंगाबाद ) : तालुक्यातील अंचलगाव जवळ एका भरधाव बोअरवेल ट्रकने चारजणांना चिरडल्याची घटना आज दुपारी ४ वाजेच्या सुमारास घडली. मृतांमध्ये तीन दुचाकीस्वार व एका पादचाऱ्याचा समावेश आहे. अक्षय प्रकाश पवार ( २१), अविनाश देविदास पवार ( २२), जगदीश विलास पवार (२२, तिघेही रा.खंडाळा) पादचारी छगन रूस्तम पवार ( ७०, रा.लोणी खुर्द) अशी मृतांची नावे आहेत.
पोलिसांनी दिलेल्या माहितीनुसार, खंडाळा अक्षय प्रकाश पवार ( २१), अविनाश देविदास पवार ( २२), जगदीश विलास पवार हे तिघे वाकला येथे लग्न सोहळ्यासाठी गेले होते. लग्न सोहळा उरकुन ते एकाच दुचाकीवर खंडाळाकडे परतण्यास निघाले. यावेळी एक बोअरवेल ट्रक शिवुर बंगलाकडून लोणी खुर्दकडे जात होता. रस्त्यातील खड्डे चुकवण्याच्या प्रयत्नात चालकाचे नियंत्रण सुटल्याने ट्रकने रस्त्यावरील पादचारी छगन रूस्तम पवार यांना चिरडले. अनियंत्रित ट्रकने समोरून येणाऱ्या दुचाकीला जोरदार धडक दिली. यात पादचारी छगन रूस्तम पवार आणि दुचाकीवरील अक्षय पवार, अविनाश पवार व जगदीश पवार यांचा जागीच मृत्यू झाला.
मृतामधील जगदीश हा औरंगाबाद येथे एका खाजगी कंपनीत नोकरी करत होता. तर अक्षय व अविनाश हे दोघे शेती करत असत. तर लोणी खुर्द येथील छगन पवार हे विनायक शैक्षणिक संस्थेचे संचालक होते.