औरंगाबाद: घरसंसारासाठी एक रूपयाची ही मदत करीत नाही, उलट घरातील पैसे उडवितो, म्हणून रागावणाऱ्या पत्नीचा व्यसनी पतीने गळा आवळून खून केल्याची घटना औरंगाबाद तालुक्यातील सुलतानपुर-वरूड काजी येथे गुरूवारी रात्री घडली. खून केल्यानंतर आरोपी पती पसार झाला असून पोलीस त्याचा शोध घेत आहे.
कमल जयाजी ओवळेकर (वय ४३,रा. सुलतानपुर,वरूडकाजी)असे मृत महिलेचे नाव आहे. तर जयाजी दत्तू ओवळेकर असे आरोपी नवऱ्याचे नाव असल्याचे पोलिसांनी सांगितले.आरोपी जयाजी आणि कमल यांचा २५ वर्षापूर्वी विवाह झाला. त्यांना विवाहित मुलगी अर्चना(वय २१), मुलगा परमेश्वर (१७) आणि ओमकार(वय ७) अशी अपत्य आहे. जयाजीला जुगार, दारूचे व्यसन आहे. या व्यसनापोटी त्याने त्याची शेती विकून टाकली आणि तो खाजगी सुरक्षा एजन्सीमध्ये सुरक्षारक्षक म्हणून काम करीत असे. परमेश्वर हा नगर रस्त्यावरील सुपा येथे एका हॉटेलमध्ये कामाला आहे.
वर्षभरापूर्वी तो वरूडकाजी जवळली सुलतानपुर येथे पत्नी आणि लहान मुलगा ओमकारसह राहण्यास आला. या आधी हे कुटुंब गंगापुर येथे राहात होते. व्यसनापोटी तो कामाच्या ठिकाणी उचल घेऊन गायब राहतो. पंधरा दिवसापूर्वी त्याने त्याची मोटारसायकल नारेगाव येथील एका जणाकडे गहाण ठेवून पैसे नेले आणि ते जुगारावर उडविले. कमलबाई ही मजूरी करून मुलाचे पोट भरते. तिच्याजवळ दोन पैसे जमा झाल्यानंतर जयाजी घरी येतो आणि कमलबाईकडून पैसे हिसकावून नेतो. आठ ते दहा दिवसापासून घरातून गायब असलेला जयाजी गुरूवारी रात्री घरी आला.
सतत घराबाहेर राहणाऱ्या जयाजीने पुन्हा कमलबाईकडे पैशाची मागणी केल्याने त्यांच्यात वाद झाला. चिमुकला ओमकार झोपलेला असताना जयाजीने पत्नी कमलचा गळा आवळून तिचा खून केला. पत्नी निपचित पडल्याचे पाहून जयाजी घर सोडून पळून गेला. या घटनेची माहिती मिळताच चिकलठाणा ठाण्याचे सहायक निरीक्षक सत्यजीत ताईतवाले, पोलीस कॉन्स्टेबल सुनील गोरे आणि कर्मचाऱ्यांनी घटनास्थळी धाव घेऊन मृतदेह घाटीत हलविला.