विश्वनाथने मशरूम व्यवसायातून शोधला उन्नतीचा मार्ग

नवरगाव : मागील वर्षांपासून कोरोनाने सर्वत्र हाहाकार माजविला. अनेकांना याचा फटका बसला. आजही अनेकजण यातून सावरले नाहीत. मात्र, रत्नापूर येथील एका तरुणाने स्वतःला सावरत राहत्या घरामध्येच सज्यावर मशरूमची बाग फुलवून आर्थिक उन्नतीचा मार्ग शोधला.

सिंदेवाही तालुक्यातील रत्नापूर येथील विश्वनाथ तिमाजी सावसाकडे या पदवीधर असलेल्या तरुणाने १९९७ मध्ये मशरूम व्यवसायाचे धडे घेतले होते. नोकरीसाठी प्रयत्न केले. परंतु नोकरी लागली नाही. शिवणकामचा व्यवसाय निवडला. पत्नी ही आपल्या व्यवसायाला मदत करणारी असावी म्हणून शिवणकला केलेलीच मुलगी मागितली. पती, पत्नी आणि मुलगा, मलगी असा परिवार आहे. कोरोनामुळे हा व्यवसायही डबघाईस आला. कुटुंबाचा गाडा पुढे कसा रेटावा, मुलगी दहावीला तर मुलगा बारावीला. त्यांच्या शिक्षणाचे काय, असे अनेक प्रश्न या कुटुंबासमोर निर्माण झाले. टेलरींगचा व्यवसाय कमी झाला. याला पूरक मशरूम व्यवसाय निवडला. पुस्तकी आणि प्रॅक्टिकल अनुभव पाठीशी होताच. मशरूमला सर्वत्र मागणी असून भावही चांगला आहे. जागेचा प्रश्न निर्माण झाला. अगदी दोन रूमचे घर. हा व्यवसाय करायचाच असा निर्धार पक्का झाल्याने शेतातील टाकाऊ गव्हांडा जमा केला. मशरूमचे स्पाॅन विकत घेतले. पिशव्यांचा वापर करून घरातील सिमेंट सज्यांवर, काही खिडक्यांमधून, तर काही दोरीच्या साहाय्याने बांधून लोंबकळत असे ५० बेड तयार केले. दिवसातून चार-पाच वेळा त्या बेडवर पाणी मारणे, वाळलेले मशरूम बाहेर काढणे, वेळोवेळी बेड बदलणे आणि विक्रीयोग्य मशरूम बाहेर काढून त्याला मार्केटमध्ये विकणे, यासाठी विश्वनाथ यांना टेलरींग व्यवसायात मदत करणारी पत्नी पुष्पा या मशरूमच्या व्यवसायात तेवढीच मदत करीत आहेत. या व्यवसायातून विश्वनाथला उन्नतीचा मार्गच सापडला.