मॅरेथाॅनमध्ये सहभागी झाले दोनशे स्पर्धक

माझी वसुंधरा अभियान : मानवी कर्तव्यांची दिली शपथ

चंद्रपूर : ‘माझी वसुंधरा अभियान व स्वच्छ सर्वेक्षण २०२१’ अंतर्गत चंद्रपूर महानगरपालिकेच्यावतीने सायकल मॅरेथॉन स्पर्धा आयोजित करण्यात आली होती. या स्पर्धेत दोनशे स्पर्धकांनी सहभाग घेतला.

या स्पर्धेचा प्रारंभ आयुक्त राजेश मोहिते, उपायुक्त विशाल वाघ, संतोष कंदेवार, सहायक आयुक्त शीतल वाकडे, धनंजय सरनाईक, विद्या पाटील, महेश बारई, विजय बोरीकर, अनिल घुमडे, आशिष मोरे, रवींद्र हजारे, डाॅ. गोपाल मुंदडा यांच्या उपस्थितीत करण्यात आला.

सकाळी गांधी चौकातून मॅरेथॉनला प्रारंभ करण्यात आला. तत्पूर्वी आपल्या वसुंधरेला सुरक्षित ठेवण्यासाठी मानवी कर्तव्याची शपथ उपस्थितांना देण्यात आली. चंद्रपूर शहरातून मुख्य रस्त्याने गांधी चौक - प्रियदर्शिनी चौक - गांधी चौक असा स्पर्धेतील मार्ग निश्‍चित करण्यात आला होता. या मार्गावर महानगरपालिका अतिक्रमण विभागाचे कर्मचारी तैनात करण्यात आले होते. आरोग्य विभागातर्फे उपस्थित सर्वांना सॅनिटायझरचा वापर करण्यास देण्यात आले. भाग घेणाऱ्या सर्व सायकलस्वारांच्या सुरक्षिततेसाठी रुग्णवाहिकाही ठेवण्यात आली होती.

यावेळी आयुक्त राजेश मोहिते म्हणाले, पर्यावरणाचा समतोल राखता यावा, शहर स्वच्छ, सुंदर व हरित व्हावे यासाठी शासनाने ‘माझी वसुंधरा’ या मोहिमेचा प्रारंभ केला आहे. पृथ्वी, वायू, जल, अग्नी आणि आकाश या पंचतत्त्वावर आधारित शाश्वत निसर्गपूरक जीवनपद्धती अवलंबिणे गरजेचे आहे. आपले शहर हे फार मोठे नाही. त्यामानाने शहरातील गाड्यांची संख्या मोठी आहे, आपल्यातील प्रत्येकाने जर रोज ५ किलोमीटर सायकल चालविण्याचा संकल्प केला तर पर्यावरणात मोठा फरक पडेल. मनपाचे कर्मचारी आठवड्यातील एक दिवस सायकलने येतात हाच कित्ता सर्वांनी गिरवायला हवा, असेही ते म्हणाले. योग नृत्य संस्थेद्वारा याप्रसंगी योग नृत्याद्वारे शारीरिक तंदुरूस्तीचे प्रात्यक्षिक करून दाखविण्यात आले. याप्रसंगी विविध महाविद्यालयांचे विद्यार्थी, सायकलिस्ट क्लब, स्वयंसेवी संस्था, इको प्रो, आयएमए, रोटरी, एसपीएम क्रिएशन आदींनी सहभाग घेतला.