अजित दादांच्या 'ऑन स्पॉट' निर्णयाने 'एचएमटी' तांदूळ जनकाला मिळाली होती पाच एकर जमीन

अजित पवारांच्या अपघाती मृत्यूने चंद्रपूर जिल्ह्यातही शोककळा पसरली आहे. ३ जून २०२३ रोजी अजित पवारांनी जिल्ह्याला दिलेली भेट अखेरची ठरली. 

एचएमटी धानाचे जनक कृषिभूषण दादाजी खोब्रागडे यांची २०१० मध्ये जागतिक स्तरावर 'फोर्ब्स'ने दखल घेतली. मात्र, त्यांच्याकडे हक्काची जमीन नव्हती. दादाजींची संशोधन कीर्ती ऐकून तत्कालीन उपमुख्यमंत्री अजित पवार यांनी थेट नांदेड गाठले. ऑन स्पॉट निर्णय घेऊन राष्ट्रवादी काँग्रेसतर्फे खोब्रागडेंना पाच एकर जमीन व रोख पाच लाख दिले. अजित दादांचा मृत्यू झाल्याचे वृत्त धडकताच जिल्हाभरातील अनेकांना चटका लावून गेला. ३ जून २०२३ ही दादांची चंद्रपूर जिल्ह्याची अखेरची भेट ठरली आहे.

पंजाबराव कृषी विद्यापीठातील तज्ज्ञांनी स्व. दादाजी खोब्रागडे यांचे एचएमटी वाण तपासण्यासाठी घेतले. पण, त्याचे श्रेय दादाजींना देण्याऐवजी विद्यापीठाने हे वाण पीकेव्ही एचएमटी या नावाने बाजारात आणले. तेव्हापासून दादाजींचा विद्यापीठाशी संघर्ष सुरू होता. अजित दादांनी ६ डिसेंबर २०१० रोजी नांदेड येथील भेटीत याबाबत संपूर्ण तपशील जाणून घेतला. घटनास्थळावरूनच त्यांनी मोबाइलने संबंधितांशी चर्चा केली. अखेर या संघर्षात दादाजींचा विजय झाला. त्यानंतर या सर्व वाणांना केवळ विदर्भातीलच नव्हे तर महाराष्ट्रातील शेतकऱ्यांनी उचलून धरले.

अजित दादा म्हणाले 'मी भपकेबाज गोष्टींवर भर देत नाही' 

माजी उपमुख्यमंत्री व विरोधी पक्षनेते असताना २८ जुलै २०२२ रोजी अजित दादांनी जिल्ह्याचा दौरा केला होता. दौऱ्यावर असताना राष्ट्रवादी पक्षाकडून कुठलेही बॅनर लागले नव्हते. मात्र, थानोरकर कुटुंबीयांच्या समर्थकांनी मोठे बॅनर लावले. तेव्हा पत्रकारांनी प्रश्न विचारताच, 'मी भपकेबाज गोष्टींवर भर देत नाही' असे मत व्यक्त केले.

अधिकाऱ्यांना फैलावर घेताच बदलला कोळसा

ऊर्जामंत्री असताना अजित दादांनी सीटीपीएसल भेट दिली होती. वीज निर्मितीसाठी वापरण्यात येणाऱ्या कोळशाबाबत त्यांनी अधिकाऱ्यांना फैलावर घेतले. त्यानंतर निकृष्ट कोळसा बदलविण्यात आला. शिवाय, काही दिवसांतच कोलमाफियांवर कारवाईही झाली होती. सिंचन प्रकल्पांना मोठा निधी मिळवून दिला. दादांच्या निर्णयाने जिल्हा वार्षिक योजनेचा नियतव्यय २५ टक्क्यांनी वाढला. अजित दादा म्हणाले 'मी भपकेबाज गोष्टींवर भर देत नाही'

...अन् बाळू आली एअर अॅम्ब्युलन्स धानोरकरांसाठी

खासदार स्व. बाळू धानोरकर यांच्या प्रकृतीत सुधारणा होत नसल्याने दिल्लीत हलवण्याचा सल्ला डॉक्टरांनी दिला. तेव्हा एअर अॅम्ब्युलन्स मिळत नव्हती. अजित दादांना कळताच सूत्रे हलवून एअर अॅम्ब्युलन्स मिळवून दिली. फोन करून प्रकृतीची विचारणा करीत होते, अशी आठवण खासदार प्रतिभा धानोरकर यांनी सांगितली. बाळू धानोरकर यांच्या मृत्यूनंतर सांत्वनेसाठी अजित दादा ३ जून २०२३ रोजी धानोरकर यांच्या वरोरा निवासस्थानी आले. सांत्वन करून गेल्यानंतर ते पुन्हा जिल्ह्यात आले नाही.