स्वाब नेचर केअर संस्थेतर्फे पेरजागड परिसरात स्वच्छता

तळोधी (बा) : तळोधी बाळापूर परिसरातील पेरजागड सात बहिणी डोंगर एक धार्मिक स्थळ मानले जाते. महाशिवरात्रीनिमित्त दरवर्षी येथे दोन दिवसांची यात्रा भरते. शिवरात्रीच्या दिवशी यात्रेत डोंगरावर वसलेल्या महादेव मंदिरात पूजा केली जाते. स्वाब नेचर केअर संस्थेतर्फे पेरजागड परिसराची स्वच्छता करण्यात आली.

भाविक मोठ्या संख्येने येतात आणि दुसऱ्या दिवशी स्थानिक परिसरातील ग्रामस्थांद्वारे महाप्रसादाचे आयोजन केले जाते; परंतु यावर्षी कोरोनाच्या खबरदारीच्या कारणामुळे पोलीस विभागाने यात्रेला परवानगी दिली नव्हती. त्यामुळे ही परंपरा खंडित झाली. तरीही हजारो भाविक येथे आले आणि डोंगराच्या पायथ्याशी असलेल्या मंदिरात प्रार्थना केली आणि परत गेले.

हा संपूर्ण परिसर घनदाट जंगलाने व्यापलेला आहे. तळोधी बाळापूर वनक्षेत्रांतर्गत येणारा पेरजागड सात बहिणी डोंगर ताडोबा अभयारण्याला लागूनच असून, नवीन घोषित घोडाझरी अभयारण्याच्या मुख्य कोअर भागात पडतो, हा परिसर सारंगड बीटमध्ये येत आहे. वन्यजीवन येथे मोठ्या प्रमाणात आहे. वन्यप्राण्यांचे प्रमाण बरेच आहे. ज्यामध्ये वाघ, बिबट्या, अस्वल यासारखे मोठे प्राणी सदैव फिरत असतात आणि या दगडी टेकडीवर शेकडो मोठ्या मधमाशांची पोळे आहेत. या मधमाशांद्वारे पर्यटकांवर वर्षभर बऱ्याचदा हल्ले होतात आणि त्यामध्ये मधमाशांच्या हल्ल्यात माणसे मृत झाल्याच्या घटना घडल्या आहेत. तरुण दुचाकी आणि कारने जंगलात येतात. नंतर जेवणानंतर प्लास्टिक, पाण्याची बाटली, प्लास्टिक आणि थर्माकोलचे पत्रावळी, मुलांचे डायपर या परिसरात टाकले जातात.

वन्यजीव अभ्यासक आणि स्वाब नेचर केअर सोसायटीचे अध्यक्ष यश कायरकर हे पक्षी निरीक्षणसाठी परिसराकडे गेले असता त्यांनी एका अस्वलाच्या कुटुंबाला इथे फेकलेल्या मुलांचे डायपर तोडताना पाहिले आणि तेव्हापासून, जंगलाला लागूनच असलेल्या जंगलातील मंदिरे, तलावाचे आवार आणि मार्ग प्लास्टिकमुक्त करण्याचा निर्णय त्यांनी घेतला. आणि त्याअंतर्गत संस्थेद्वारे प्रत्येक आठवड्यात ‘धेय प्लास्टिकमुक्त निसर्ग अभियान’चे परिसरात आयोजन केली जाते. त्यानुसार महाशिवरात्रीच्या २ दिवसांनंतर पेरजागड परिसरात स्वच्छता करण्यात आली. या स्वच्छता मोहिमेमध्ये स्वाब नेचर केअर सोसायटीचे अध्यक्ष यशवंत कायरकर, उपाध्यक्ष स्वप्नील बोधनकर, सदस्य हितेश मुंगमोडे, वेदप्रकाश मेश्राम, सूरज गेडाम, कुणाल रामटेके, अनिकेत बावणे, येनोली (माल)चे वनरक्षक एस.एस. गौरकर आणि सारगगंड बीटचे वनरक्षक एस. यम. जुमनाके यांनीही मदत केली.