नगर पंचायत सफाई कामगारांचा वेतनाचा प्रश्न ऐरणीवर

फोटो

गोंडपिपरी : येथील नगर पंचायतअंतर्गत कार्यरत कंत्राटी सफाई कामगार ५ फेब्रुवारी २०२१ ला प्रलंबित आणि थकीत वेतनाचा मुद्दा घेऊन साखळी उपोषणाला बसले. प्रशासनाकडून कोणत्याच गोष्टीचे सहकार्य मिळत नसल्याचे दिसताच उपोषण तीव्र करून मागण्या रेटून धरल्या. यासंदर्भात कामगारांवर अन्याय करणाऱ्या संबंधितांवर कायदेशीर कार्यवाही करण्याचे लेखी आदेश सहायक कामगार आयुक्त चंद्रपूर यांनी गोंडपिपरी नगर प्रशासनाला दिले. असे असतानाही सफाई कामगारांना अल्प वेतन देऊ केल्याने येथील सफाई कामगारांचा वेतनाचा प्रश्न पुन्हा एकदा ऐरणीवर आला आहे.

शासनाच्या नियमावलीत कुशल कामगारांना १६ हजार रुपये तर अर्धकुशल कामगारांना १४ हजार रुपये इतर देय भत्ते मिळून महिन्याचे वेतन देण्याचे नमूद आहे. त्याचप्रमाणे महिन्यातून दोन रजा कामगाराच्या इच्छेनुसार घेता येईल, असा नियमदेखील शासनाने निर्गमित केला आहे. नगर पंचायत स्थापन झाल्यापासून कामगारांना मात्र १५० ते १७० रुपये रोजी देऊन राबविल्या जात असून कामगारांच्या भविष्य निर्वाह निधीमध्ये फार मोठा भ्रष्टाचार झाल्याचे आढळून आले आहे. काम करणारे दुसरेच आणि भविष्य निर्वाह निधीच्या रकमेची उचल करणारे दुसरेच, असा भोंगळ कारभार माहितीच्या अधिकारदरम्यान समोर आला आहे. बरेच वर्षांपासून कामगारांचे आर्थिक शोषण होत असल्याचा प्रकार जय भवानी कामगार संघटनेचे जिल्हा अध्यक्ष सूरज ठाकरे यांच्या निदर्शनास आणून दिला. त्यांनी या संपूर्ण प्रकरणाचा लेखाजोखा शासनदरबारी रेटून धरला आणि कामगारांच्या बाजूंनी मंजूरसुद्धा झाला.

बॉक्स

प्रशासनाने अंत पाहू नये

एक महिन्याचा कालावधी लोटला असूनदेखील नगर पंचायतकडून अद्याप कोणत्याच गोष्टीची पूर्तता करण्यात आली नाही. नगर प्रशासनाने कामगारांच्या सहनशीलतेचा अंत पाहू नये. अन्यथा येत्या काही दिवसात तीव्र आंदोलनाचा पवित्रा घेऊ, असा इशारा जय भवानी कामगार संघटनेचे संस्थापक अध्यक्ष सूरज ठाकरे यांनी नगर प्रशासनाला दिला आहे.