Chandrapur News | Latest Chandrapur News in Marathi | Chandrapur Local News Updates | ताज्यबातम्या चंद्रपूर | चंद्रपूर समाचार | Chandrapur Newspaper

जिवती : मनुष्याला जीवन जगताना अनंत अडचणींना समोर जावे लागते. त्या अडचणीवर उपाय शोधताना प्रसंगी संपूर्ण आयुष्य खर्ची घालावे लागते. आयुष्याच्या शेवटच्या क्षणी इहलोकीची यात्रा तरी सुखद व्हावी, अशी माफक अपेक्षा असते. परंतु तालुक्यासह अनेक गावांत स्मशानभूमीच नसल्याने मृत्युनंतरही समस्या पाठ सोडत नसल्याचे विदारक वास्तव आहे.स्वातंत्र्याच्या अनेक वर्षानंतरही या भागातील समस्या कायम चिटकून बसल्या आहेत. देशात भौतिक व आधुनिक तंत्रज्ञानात प्रगती केल्याने मनुष्य सुखी झाल्याचे दिसत आहे. परंतु आजही ग्रामीण भागातील नागरिकांना मुलभूत सुविधाच मिळत नसल्याचे वास्तव आहे. तालुक्याचे ठिकाण असलेल्या जिवतीत स्मशानभूमीच्या जागेचा सातबारा आहे; पण जागाच नाही, अशी परिस्थिती आहे. तालुक्यातील काही मोजक्या ठिकाणी स्मशानभूमी आहे, पण तुटलेले शेड आहे. परिसराला झुडपांचा विळखा पडला आहे. अशा प्रतिकूल परिस्थितीत नातेवाईक व नागरिकांना उघड्यावरच अंत्यसंस्कार उरकावे लागतात. पावसाळ्यात तर अंत्यविधी करण्यासाठी मोठी अडचण निर्माण होते.कित्येकवेळा मृतदेह घरातच ठेवून पाऊस कधी थांबेल, याकडे सगळ्यांचे लक्ष लागलेले असते. स्मशानभूमी व जागेसाठी प्रशासन व लोकप्रतिनिधींनी लक्ष द्यावे, अश मागणी आहे. शासन विकासासाठी कोट्यवधी रुपये खर्च करते. मग जनतेचा विकास का होत नाही. येणारा निधी कुणाच्या घशात जातो असा प्रश्नही नागरिक विचारु लागले आहेत. (तालुका प्रतिनिधी)

Chandrapur (Marathi News)