राजू गेडाम
मूल : राजकीयदृष्ट्या संवेदनशील समजल्या जाणाऱ्या मूल तालुक्यात ३५ ग्रामपंचायतींच्या निवडणुकीत सत्तारूढ असलेल्या पक्षाला जनतेने नाकारत सत्तापरिवर्तन घडवून आणल्याचे दिसून आले. ५ व ६ फेब्रुवारी रोजी सरपंचपदाची निवडणूक होत असून, ३७ पैकी २१ गावांत महिला सरपंच विराजमान होणार असल्याने निवडणूक हालचालींना वेग आला आहे.
ग्रामपंचायतींच्या निवडणुका नुकत्याच पार पडल्या. यात भाजप, काँग्रेसला जनतेने काही प्रमाणात नाकारत मतदारांनी आठ ग्रामपंचायतींवर शिवसेना, आम आदमी पार्टी, वंचित बहुजन आघाडी व युवा परिवर्तन आघाडीने आपली सत्ता स्थापन केली. त्यामुळे काँग्रेस १४, तर भाजपला १३ ग्रामपंचायतींवरच समाधान मानावे लागले होते. ग्रामपंचायतींच्या निवडणुकीत आपली सत्ता येईल, असे दावे-प्रतिदावे केले जात होते. मात्र, या निवडणुकीत प्रस्थापितांना धक्का देत नवपरिवर्तन घडून आल्याचे दिसून आले. या निवडणुकीत काँग्रेसने भादुर्णी, राजोली, चिखली, मोरवाही, मरेगाव, चिमढा, चांदापूर, चिरोली, खालवसपेठ, दाबगाव मक्ता, नांदगाव गागलवाडी, भादुर्णी, कोसंबी या ग्रामपंचायतींवर सत्ता मिळविली, तर भाजपने मारोडा, काटवन, मुरमाडी, डोंगरगाव, बोरचादली, फिस्कुटी, विरई, गोवेर्धन, हळदी, पिपरी दीक्षित, जुनासुर्ला, नवेगाव भूजला, बोडाळा बुज ग्रामपंचायतींची सत्ता काबीज केली आहे. यात विशेष म्हणजे ८ गावांत जनतेने नवीन पक्ष व आघाडीला झुकते माप देत परिवर्तन घडवून आणल्याचे दिसून आले. यात शिवसेनेने भवराळा, सुशी, वंचित बहुजन आघाडीने केळ्झर, आम आदमी पार्टीने चितेगाव, तर गावात एकत्र येऊन तयार केलेल्या युवा परिवर्तन आघाडीने टेकाडी, जानाळा, चिचाळा, येरगाव या गावांत सत्ता मिळविली.
मूल तालुक्यात ३७ ग्रामपंचायतींवर सरपंच विराजमान होणार असून, २१ महिला सरपंच होणार आहेत. एकप्रकारे मूल तालुक्यात महिलाराज येणार हे निश्चित झाले आहे.