पाठपुराव्याअभावी अग्निशमन वाहन खरेदी प्रक्रिया रखडली

सावली : सर्वसामान्य जनतेचे आगीपासून संरक्षण करण्यासाठी अत्यावश्यक असलेल्या अग्निशमन यंत्रणेला अजूनही अंतिम मंजुरी प्राप्त झालेली नाही. पाठपुराव्याअभावी अग्निशमन वाहन खरेदीचा प्रस्ताव शासन दरबारी पडून आहे. याकडे नगरपंचायत प्रशासनाचे दुर्लक्ष होत असल्याची गंभीर बाब समोर आली आहे.

दिवसेंदिवस उन्हाचा तडाका जोर पकडत आहे. सावली तालुक्यात मागील काही दिवसांपासून आगीच्या अनेक घटना घडल्या आहेत. आगीवर नियंत्रण मिळवण्याकरिता चंद्रपूर, बल्लारशा, मूल, पोंभूर्णा येथून अग्निशमन दलास पाचारण करावे लागते. ऐनवेळी अग्निशमन दल पोहोचत नसल्याने आर्थिक नुकसानही सहन करावे लागले आहे. सावली शहर दाट वस्तीचे शहर असून, आगीपासून होणारे नुकसान टाळण्यासाठी सावली नगरपंचायतकडे पुरेशी अग्निशमन यंत्रणा असणे आवश्यक आहे. या पार्श्वभूमीवर स्थानिक नगरपंचायतमध्ये अग्निशमन यंत्रणेचे वाहन असावे, याकरिता वंचित बहुजन आघाडीने गत दीड वर्षांपूर्वी अग्निशमन दलाची मागणी केली होती. यासाठी विविध पातळीवर पाठपुरावा करण्यात आला.

जिल्ह्याचे पालकमंत्री विजय वडेट्टीवार यांनी मागील महिन्यात डीपीडीसी या निधीतून अग्निशमन वाहन खरेदीकरिता निधी उपलब्ध करून दिला. मात्र अद्यापपर्यंत नगर पंचायतच्या पाठपुराव्याअभावी अग्निशमन वाहनाची खरेदी रखडलेलीच आहे.

बॉक्स

नगरपंचायत होऊन पाच वर्ष लोटली

या शहराला नगरपंचायतीचा दर्जा मिळून पाच वर्षाचा कालावधी पूर्ण झाला. परंतु स्थानिक पातळीवर आजही अत्यावश्यक सोयी सुविधा उपलब्ध नसल्याने नागरिकांच्या सुरक्षेचा प्रश्‍न ऐरणीवर आला आहे. शहरात किंवा परिसरात आगीच्या घटना घडल्यास आग विझवण्यासाठी कोणतीही व्यवस्था नाही.

तालुक्यात १११ गावे असून, शहरात किंवा परिसरात आगीच्या घटना घडल्यास बाहेरगावाहून अग्निशमन दलास पाचारण करावे लागते. सदर वाहन पोहोचेपर्यंत उशीर होतो व आगीवर नियंत्रण मिळवणे कठीण होत आहे. त्यामुळे लोकप्रतिनिधींच्या माध्यमातून पाठपुरावा करून सावली शहराकरिता अग्निशमन वाहन खरेदी करावे, अशी मागणी सर्वसामान्यांकडून करण्यात येत आहे.