‘गर्भसंस्कारा’तून घडवा देशभक्त पिढी

चंद्रपूर : जगात शक्तिशाली देशांच्या यादीत चीन दुसऱ्या क्रमांकावर जाण्याची अनेक कारणे आहेत. परंतु, त्यातील सर्वांत महत्त्वाचे कारण म्हणजे त्यांनी ओळखलेले गर्भसंस्काराचे महत्त्व आणि त्यांनी सुरू केलेली विशेष योजना होय. त्यामुळे देशभक्ती कृतीत आणणारी व सुदृढ पिढी घडवण्यासाठी गर्भवती मातांनी गर्भसंस्कारांचे महत्त्व ओळखणे महत्त्वाचे आहे, असे प्रतिपादन विधिमंडळ लोकलेखा समितीचे अध्यक्ष व माजी अर्थमंत्री आमदार सुधीर मुनगंटीवार यांनी केले.

चंद्रपूर शहर महानगरपालिकेद्वारे पंतप्रधान नरेंद्र मोदी यांच्या वाढदिवसानिमित्त आयोजित प्रधानमंत्री मातृवंदना योजनेंतर्गत गरोदर माता लाभार्थींना अनुदान किट वाटप कार्यक्रमाच्या वेळी ते बोलत होते. योजनेची माहिती डिजिटल पुस्तिकेमार्फत तसेच इतर माध्यमांद्वारे जास्तीत जास्त नागरिकांपर्यंत पोहोचवावी, अशी सूचना त्यांनी यावेळी केली. यावेळी मनपाच्या वतीने महापौर राखी कंचर्लावार यांच्या हस्ते आमदार सुधीर मुनगंटीवार यांचा शाल, श्रीफळ व स्मृतिचिन्ह देऊन सत्कार करण्यात आला. यावेळी महापौर राखी कंचर्लावार, उपमहापौर राहुल पावडे, स्थायी समिती सभापती रवी आसवानी, अतिरिक्त आयुक्त विपीन पालीवाल, सभागृह नेता संदीप आवारी, सभापती छबू वैरागडे, महिला व बालकल्याण सभापती चंद्रकला सोयाम, महिला व बालकल्याण उपसभापती पुष्पा उराडे, गटनेत्या जयश्री जुमडे, भाजप जिल्हाध्यक्ष डॉ. मंगेश गुलवाडे, प्रकाश धारणे, माजी जि. प. सभापती ब्रिजभूषण पाझारे उपस्थित होते. यावेळी आमदार सुधीर मुनगंटीवार यांच्या हस्ते शहरातील नोंदणी झालेल्या ७१ गर्भवती मातांना प्रमाणपत्र व किट वितरित करण्यात आले. यावेळी महापौर कंचर्लावार यांनी मार्गदर्शन केले. प्रास्ताविक अतिरिक्त आयुक्त विपीन पालीवाल, संचालन सुनीता अडबाले यांनी केले. कार्यक्रमाला नगरसेवक संजय कंचर्लावार, नगरसेवक सुभाष कासनगोट्टूवार, नगरसेविका सविता कांबळे, नगरसेविका कल्पना बगुलकर, नगरसेवक सचिन भोयर, ॲड. राहुल घोटेकर आदी उपस्थित होते.