चिमूरमध्ये कोरोना वाढला, प्रशासनाने गंभीर व्हावे

चिमूर : चिमूर शहर व तालुक्यात कोरोना झपाट्याने वाढत आहे. प्रशासन मात्र नरमाईचे धोरण अवलंबित असल्याने कोरोना वाढत आहे. यावर प्रतिबंध करण्यासाठी विना मास्क असणाऱ्यांवर प्रतिबंध घालणे आवश्यक आहे. तसेच कोरोना लसीचा डोस वाढविण्यासाठी गाव पातळीवर एक समिती तयार करून कोरोना लस देण्याचे प्रमाण वाढवण्याची गरज आहे. यासाठी प्रशासनाने कडक पावले उचलणे आवश्यक असल्याचे निर्देश आमदार कीर्तिकुमार भांगडिया यांनी दिले.

तहसील कार्यालयात आयोजित कोरोना प्रादुर्भाव बैठकीत ते बोलत होते. यावेळी जि.प. उपाध्यक्ष रेखा कारेकर, भाजपचे तालुका अध्यक्ष राजू पाटील झाडे, एसडीओ प्रकाश संकपाळ, चिमूरचे ठाणेदार रवींद्र शिंदे, भिसीचे ठाणेदार मनोज गभणे आदी उपस्थित होते.

आ. भांगडिया म्हणाले, कोरोना लसींचे टार्गेट वाढवून चिमूर शहरात दररोज दोनशे कोरोना डोस देणे गरजेचे असल्याचे सांगत भिसी, शंकरपूर, नेरी, मासळ, खडसंगी गावातसुद्धा निष्काळजी न करता कडक कारवाई करण्याचे सांगितले. काही अडचणी आल्यास त्या अडचणी सोडविण्यासाठी आपण तत्पर असल्याचेही ते म्हणाले.

बैठकीत वैद्यकीय अधिकारी डॉ. गो.वा. भगत, डॉ. अश्विन अगडे, तालुका आरोग्य अधिकारी डॉ. दिगंबर मेश्राम, नपचे अधीक्षक राकेश चौगुले, बीडीओ संजय पुरी, डॉ. श्यामजी हटवादे, राजू देवतळे, विनोद चोखरे, प्रशांत चिडे, अशोक कामडी, नाना मेश्राम, अजय शिरभैय्ये, रमेश कंचर्लावार, संजय कुंभारे, अरुण लोहकरे, विकी कोरेकर, सुरज नरुले, योगेश सहारे, शैलेश पाटील, अरुण सालेकर आदी उपस्थित होते.