चंद्रपूर : भद्रावती तालुक्यातील मांगली गावातील जगन्नाथ बाबा मठात दोन शेतकऱ्यांची वजनदार वस्तूने डोक्यावर ठेचून निर्घृण हत्या झाल्याची घटना गुरुवारी पहाटे उघडकीस आली. ही घटना कळताच गावकऱ्यांनी घटनास्थळी धाव घेतली.
बापूराव संभा खारकर (७७), मधुकर लटारी खुजे (६०) दोघेही राहणार मांगली. हे शेतकरी असून त्यांची शेती जगन्नाथ बाबा मठाच्या लगत आहे. या परिसरात वाघाची दहशत असल्याने ते नेहमी या मठात रात्रीला जागलीसाठी येत होते. घटनेच्या दिवशी हे दोघेही शेताची जागली झाल्यावर मंदिरात झोपले असता या दोघांची वजनदार वस्तूने डोक्यावर वार करून निघृण हत्या झाल्याचे घटनास्थळाच्या अवलोकनावरून दिसून येते. दोघांचे मृतदेह दोन बाजूला पडले होते.
पहाटे दरम्यान मधुकरचा पुतण्या नेमीयन खुजे मंदिराकडे गेला असता त्याला दोन्ही मृतदेह रक्ताच्या थारोळयात दिसले. या घटनेची माहिती संपूर्ण गावाला कळताच एकच गर्दी केली होती. जिल्हा पोलीस अधीक्षक घटनास्थळी दाखल झाले आहे. या मंदिरातील दानपेटी फोडून तिला बाजूला फेकली होती. दानपेटीत फारशी रक्कम राहत नसल्याचे गावकऱ्यांचे म्हणणे आहे. जगन्नाथ बाबाला वाहिलेले चांदीचे दागिने तिथेच होते. मग ही घटना नेमकी कशासाठी करण्यात आली, याचा तपास भद्रावती पोलीस करीत आहेत.