सोमनाथ देवस्थानची संपत्ती ताब्यात घेण्याचा प्रयत्न

लोकमत न्यूज नेटवर्क

मूल : तालुक्यातील पर्यटन स्थळ व श्रद्धास्थान असलेल्या सोमनाथ देवस्थानची चल व अचल संपत्ती हडपण्यासाठी नवीन न्यासाची घटना तयार करणे व नवनियुक्त सरपंचाना देवस्थानचा अध्यक्ष म्हणून कार्यभार देण्यास टाळाटाळ करणे, आदी बाबी केल्या जात असल्याचा आरोप नवनिर्वाचित सरपंच भिकारु शेन्डे व सदस्यांनी मूल येथील विश्रामगृहात आयोजित पत्रकार परिषदेत केला आहे.

ग्रामपंचायत मारोडा अंतर्गत सोमनाथ देवस्थानचा कारभार चालवला जातो. देवस्थानचा कारभार सुरळीतपणे चालावा, यासाठी सार्वजनिक विश्वस्त व्यवस्था १९५०च्या अधिनियमानुसार सन १९६१ला मारोडाचे सरपंच जगन्नाथ नेरलवार यांनी न्यास निर्माण केला. या न्यासात ग्रामपंचायतीचे पाच सदस्य व गावातील १० ग्रामस्थ असे १५ सदस्य सोमनाथ देवस्थानचा कारभार सांभाळतील, असे ठरविण्यात आले. यात सरपंच हे पदसिद्ध अध्यक्ष राहतील, असे नमूद करण्यात आले. त्यानुसार सन १९६१ ते २०१५पर्यंत नऊ सरपंचांनी सोमनाथ देवस्थानचे अध्यक्षपद सांभाळले. सन २०१५मध्ये सरपंच झालेल्या स्वाती पुनकटवार व सदस्य पंकज पुल्लावार यांनी सोमनाथ देवस्थानची कुठलीही नियम व नियमावली नसल्याची संधी साधून धर्मदाय आयुक्त, चंद्रपूर येथे सोमनाथ देवस्थानची नवीन घटना तयार करुन मान्यतेसाठी प्रस्ताव सादर केला. याबाबत मारोडा येथील कुणालाही माहिती न देता, आडमार्गाने हे काम करण्यात आले.

सोमनाथ देवस्थानातील चल व अचल संपत्ती हडपण्यासाठी नवीन घटना तयार करणे, नवीन सरपंचाना देवस्थानचा कार्यभार न देणे आदी प्रकार केले जात असल्याचा आरोप सरपंच भिकारु शेन्डे व नवनियुक्त सदस्यांनी पत्रकार परिषदेत केला आहे. याबाबत लवकरात लवकर निर्णय न झाल्यास कायदेशीर मार्गाचा अवलंब केला जाईल, असेही त्यांनी यावेळी सांगितले. यावेळी ग्रामपंचायत सदस्य बंडू गेडाम, अर्चना उइके, दर्शना मेश्राम, माधुरी निकेसर, सरिता ऊत्तलवार, सोनी मोहुर्ले, सचिन गुरुनुले आदी उपस्थित होते.