12th Pass Jobs: इंडियन ऑईलमध्ये बंपर भरती; बारावी उत्तीर्ण तरूणांना सरकारी नोकरीची संधी!

Indian Oil Corporation Limited Recruitment 2025: सरकारी नोकरीच्या शोधात असलेल्या तरुणांसाठी चांगली बातमी आहे.

सरकारी नोकरीच्या शोधात असलेल्या तरुणांसाठी चांगली बातमी आहे. इंडियन ऑइल कॉर्पोरेशन लिमिटेडने देशभरातील आपल्या विविध रिफायनरीजमध्ये एकूण २ हजार ७५५ प्रशिक्षणार्थी पदांसाठी भरतीची घोषणा केली. बारावी, आयटीआय किंवा डिप्लोमा पूर्ण केलेल्या उमेदवारांसाठी उद्योगात करिअर करण्याची ही एक सुवर्णसंधी आहे. इच्छुक आणि पात्र उमेदवार आयओसीएलच्या अधिकृत वेबसाइट iocl.com ला भेट देऊन अर्ज करू शकतात.

आयओसीएलने रिफायनरीनुसार पदांचे वाटप केले आहे. पानिपत रिफायनरी, गुजरात रिफायनरी आणि मथुरा रिफायनरीमध्ये सर्वाधिक पदांची भरती केली जाणार आहे. पानिपत रिफायनरीला ७०७ पदे, गुजरात रिफायनरीला ५८३ पदे आणि मथुरा रिफायनरीला २८० पदे मिळाली आहेत. तर, दिगबोई, पारादीप, बरौनी, हल्दिया, बोंगाईगाव आणि गुवाहाटी येथील रिफायनरीजमध्येही महत्त्वाची पदे उपलब्ध आहेत. या भरतीसाठी अर्ज करण्याची अंतिम तारीख १८ डिसेंबर २०२५ आहे. त्यानंतर कोणत्याही उमेदवाराचे अर्ज स्वीकारले जाणार नाहीत.

शैक्षणिक पात्रता आणि वयोमर्यादा

- उमेदवार मान्यताप्राप्त बोर्डातून १२वी उत्तीर्ण असणे आवश्यक आहे.
- संबंधित क्षेत्रात डिप्लोमा किंवा आयटीआय पदवी असणे आवश्यक आहे.
-  या भरतीसाठी वयोमर्यादा १८ ते २४ वर्षे निश्चित करण्यात आली. तर, ओबीसी (२७ वर्षे), एससी आणि एससटी (२९ वर्षे) प्रवर्गातील उमेदवारांना वयोगटात सूट देण्यात आली.

अर्ज प्रक्रिया

- सर्वात प्रथम उमेदवारांनी  आयओसीएलच्या अधिकृत वेबसाइटला भेट द्यावी.
- त्यानंतर 'आयओसीएल अप्रेंटिस भरती २०२५ ऑनलाइन अर्ज करा', या पर्यायावर क्लिक करा.
- पुढे अर्ज भरा आणि त्यानंतर शुल्क भरून फॉर्म सबमिट करा.

निवड प्रक्रिया 

या पदांसाठी कोणतीही लेखी परीक्षा घेतली जाणार नाही. इंडियन ऑइलमध्ये निवड प्रक्रिया पूर्णपणे गुणवत्तेवर आधारित असेल.  शैक्षणिक गुणांच्या आधारावर गुणवत्ता यादी तयार केली जाईल. निवडलेल्या उमेदवारांची कागदपत्र पडताळणी केली जाईल. त्यानंतर वैद्यकीय चाचणी घेतली जाईल. वरील प्रक्रिया पूर्ण झाल्यानंतर अंतिम निवड केली जाईल.

प्रशिक्षण आणि स्टायपेंड

प्रशिक्षणार्थी पदांसाठी प्रशिक्षण कालावधी १२ ते २४ महिन्यांपर्यंत असेल. या कालावधीत, निवडलेल्या उमेदवारांना कंपनीच्या नियमांनुसार स्टायपेंड दिला जाईल.