वाहतूक नियमांचे उल्लंघन, दाेन लाखांच्यावर दंड वसूल

बुलडाणा : नियमांचे उल्लंघन करणाऱ्या वाहन चालकांविरुद्ध वाहतूक शाखेच्या वतीने जिल्हाभरात विशेष माेहीम राबविण्यात आली आहे. दाेन दिवसांत नियमांचे उल्लंघन करणाऱ्या १०२३ वाहन चालकांवर कारवाई करून २ लाख ३८ हजार ५०० रुपयांचा दंड वसूल करण्यात आला आहे.

जिल्ह्यात गत काही दिवसांपासून वाहन चालकांकडून नियमांचे उल्लंघन करण्यात येत आहे. अनेक वाहन चालक आपल्या वाहनांवर फॅन्सी नंबर प्लेट लावून फिरवत आहेत तसेच ट्रिपल सीट, वाहन चालविण्याचा परवाना नसणे, आदी प्रकार वाढले हाेते. जिल्हा वाहतूक शाखेच्या वतीने २२ व २३ सप्टेंबर राेजी जिल्हाभरात विशेष माेहीम राबवण्यात आली आहे. २२ सप्टेंबर राेजी ४६३ वाहन चालकांवर कारवाई करून त्यांच्याकडून १ लाख १३ हजार १०० रुपयांचा दंड वसूल करण्यात आला आहे तसेच २३ सप्टेंबर राेजी ५६० वाहन चालकांकडून १ लाख २५ हजार ४०० रुपयांचा दंड वसूल करण्यात आला आहे.

कागदपत्रे न वापरणाऱ्यांची संख्या वाढली

वाहतूक शाखेने २२ सप्टेंबर राेजी केलेल्या कारवाईत अनेक वाहन चालकांकडे वैध कागदपत्रे आढळून आली नाहीत. कागदपत्रे न बाळगणाऱ्या १७५ वाहनचालकांवर कारवाई करण्यात आली तसेच ट्रिपल सीट ५८, सीटबेल्ट न बांधणाऱ्या ३१ कार चालक, नाे पार्किंगमध्ये वाहने उभे करणाऱ्या ६१ जणांवर कारवाई करण्यात आली.

थकीत दंड वसुलीची माेहीम

जिल्हा वाहतूक शाखेच्या वतीने थकीत दंड वसुलीची माेहीम राबविण्यात आली आहे. या माेहिमेंतर्गत ८१५ वाहन चालकांकडून २ लाख ४२ हजार ६०० रुपयांचा दंड वसूल करण्यात आला आहे. या दिवशी थकीत दंड न भरणाऱ्यांसाठी २५ सप्टेंबर रोजी जिल्ह्यातील सर्व तालुका न्यायालयात थकीत दंडाच्या रकमेचा भरणा करून घेण्याकरिता लोकअदालत आयोजित करण्यात येणार आहे. या दिवशी न्यायालयात जाऊन अपला दंड भरून शासनास सहकार्य करावे, असे आवाहन पाेलीस अधीक्षक अरविंद चावरीया, प्रभारी वाहतूक शाखा निरीक्षक शांतीकुमार पाटील यांनी केले आहे.