ठाण्याच्या आवारात विष प्राशन

खामगाव येथे एका युवकांची गळफास घेऊ न आत्महत्या तर दुस-या युवकाचा विष प्राशुन आत्मह त्येचा प्रयत्न.

खामगाव (बुलडाणा) : पत्नीचा विरह सहन न झाल्याने एकाने गळफास घेऊन जीवन संपविल्याची, तर दुसर्‍याने शहर पोलीस ठाण्याच्या आवारातच विष घेऊन जीवन संपविण्याचा प्रयत्न केला. या घटना अनुक्रमे ८ मार्चच्या मध्यरात्री व ९ मार्चचे दुपारी १२.३५ वाजेदरम्यान घडली. स्थानिक समता कॉलनीतील रहिवासी अतुल पुरुषोत्तम मांडोकार (वय ३६) याची पत्नी घरगुती वादा तून चार वर्षाअगोदर माहेरी मलकापूर येथे मुलीला घेऊन निघून गेलेली आहे. तसेच तिने अतुल मांडोकार यांच्याविरुद्ध पोलिसांत तक्रारही दिलेली आहे. दरम्यान, अतुल मांडोकार ८ मार्चच्या मध्यरात्रीनंतर राहते घरात गळफास घेऊन आत्महत्या केल्याचे उघडकीस आले. पत्नी व मुलीच्या विरहामुळे तणावात येऊन अतुल मांडोकार यांनी जीवन संपविले, असे सांगण्यात येत आहे. दुसर्‍या घटनेत नांदुरा तालुक्यातील कोळंबा येथील रहिवाशी नंदकिशोर प्रल्हाद वाकोडे व पत्नी रू पाली यांच्यात गेल्या काही दिवसांपासून वाद होत होते. त्यामुळे रूपाली ही दोन मुलांना पतीकडे सोडून माहेरी खामगाव येथे निघून आलेली आहे. वारंवार विनवणी करूनही ती परत येत नसल्याने नंदकिशोर याने स्थानिक शहर पोस्टेच्या समुपदेशन केंद्रामार्फतही पत्नीला परत आणण्याचे प्रयत्न केले; मात्र काही केल्या ती परत येत नसल्याने त्याने आज चक्क शहर पोलीस ठाण्यात येऊन विषारी औषध प्राशन केले. या प्रकारामुळे उपस्थित पोलीस कर्मचार्‍यांमध्ये एकच खळबळ उडाली. यावेळी पोलसांनी त्याला तात्काळ येथील सामान्य रूग्णालयात उपचारार्थ दाखल केले. त्याच्याविरुद्ध भादंविचे कलम ३0९ नुसार गुन्हाही दाखल केला आहे. या घटनांमुळे समाजातील धुरिणांनी तंटे सोडविण्यासाठी पुढाकार घेण्याची गरज व्यक्त होत आहे.