चांडोळ प्राथमिक आरोग्य केंद्रातील कर्मचाऱ्यांचा असाही बेजबाबदारपणा

पंचायत समिती सभापती उषाताई चाटे यांच्यासह पंचायत समिती सदस्यांचा या भागात पाहणी दौरा होता. यावेळी त्यांनी उपसरपंच निर्मलाबाई देशमुख यांच्यासह आपल्या पदाधिकारी समवेत भेट दिली. त्यावेळी हा प्रकार उघडकीस आला. या प्रकाराबाबत उपसरपंच निर्मलाताई देशमुख यांनीसुद्धा नाराजी व्यक्त केली. तसेच इतरही अनेक पदे रिक्त असल्याने स्थानिक व विदर्भ परिसरातील २१ गावे सामील असून, मराठवाड्यातीलसुद्धा बहुसंख्य नागरिक येथे उपचारासाठी येतात. परंतु, भर दिवसा आरोग्य केंद्रात कर्मचारी उपस्थित नसल्याने रात्रीची परिस्थिती काय असेल याचा विचार न केलेलाच बरा, अशी संतप्त प्रतिक्रिया सभापती व सदस्य आणि उपसरपंच यांनी व्यक्त केली. त्यामुळे चांडोळ येथील प्राथमिक आरोग्य केंद्रच आजारी असल्याची अवस्था निर्माण झाली आहे. ग्रामीण भागातील बहुसंख्य नागरिक प्राथमिक आरोग्य केंद्रावर अवलंबून असतात. परंतु, ज्याठिकाणी आरोग्य यंत्रणाच आजारी असेल तेथे रुग्णसेवेची अपेक्षा ठेवणे कठीण झाले आहे.

पालकमंत्र्यांकडे केली तक्रार

आजारी यंत्रणेवरच रुग्णसेवेची भिस्त असल्याने ग्रामीण भागातील नागरिकांची हेळसांड होताना दिसत आहे. त्यामुळे उपसरपंच निर्मलाबाई देशमुख यांनी आरोग्यमंत्री व पालकमंत्री यांच्याकडे या गंभीर बाबीची तक्रार केली आहे. प्राथमिक आरोग्य केंद्रात कायमस्वरूपी वैद्यकीय अधिकारी नसल्याने इतर कर्मचाऱ्यांवर कोणाचाच वचक राहिलेला नाही. प्रभारी वैद्यकीय अधिकारी डॉ. मोनाली आने सध्या म्हस्ला येथे कार्यरत आहेत. तसेच चांडोळ येथील सहा उपकेंद्र व २१ गावांचा भार प्रभारी अधिकाऱ्यांच्या भरवशावर अवलंबून आहे.

एकही कर्मचारी राहत नाही मुख्यालयी

कोणतेच कर्मचारी मुख्यालयी राहत नसल्याचीही माहिती समोर आली आहे. म्हणजेच रात्री-अपरात्रीच्या वेळेस स्थानिक अथवा परिसरातून जर प्रसूतीसाठी महिला रुग्ण आल्यास डॉक्टरअभावी त्या रुग्णास रेफरशिवाय दुसरा पर्यायच राहणार नाही. त्यासाठी कर्मचाऱ्यांना मुख्यालयी राहणे बंधनकारक करणे गरजेचे आहे. रुग्णांना रात्री-अपरात्री सेवा देण्यासाठी कोणतेही जबाबदार अधिकारी व कर्मचारी उपस्थित नसल्याने केवळ आरोग्य सेविकेच्या भरवशावर रुग्णालयाची जबाबदारी थोपवतात. याठिकाणी प्रसूतीबरोबरच कुटुंब नियोजन शस्त्रक्रियासुद्धा केल्या जातात. परंतु, यासाठी रुग्णालयात जबाबदार कायमस्वरूपी अधिकारीअभावी रुग्णांची हेळसांड होताना दिसत आहे.

प्रा. आरोग्य केंद्रात कर्मचारी मुख्यालयी राहत नाही. तसेच रात्री एखादे इमर्जन्सी रुग्ण आल्यास कोणतेच जबाबदार अधिकारी किंवा डॉक्टर नसल्याने रुग्णांची हेळसांड होते. त्यामुळे या गंभीर समस्येकडे आरोग्य विभागातील वरिष्ठांनी लक्ष केंद्रित करावे.

- निर्मलाबाई देशमुख, उपसरपंच चांडोळ.

प्रा. आ. केंद्रात गेले असता केवळ दोनच कर्मचारी उपस्थित होते. इतर अधिकारी व कर्मचारी गैरहजर होते. त्यामुळे या गंभीर बाबीची वरिष्ठांना माहिती देण्यात आली. तसेच लवकर या बाबतीत गैरहजर असणाऱ्या कर्मचाऱ्यांवर कारवाई करण्यात येईल.

- उषा चाटे, पं. स. सभापती बुलडाणा.