दिव्यांगाच्या जीवनात नवी पहाट!

माहेश्‍वरी मंडळाची सामाजिक बांधीलकी; १३८ दिव्यांगांना दिले कृत्रिम पाय .

खामगाव, दि. 0९- श्री माहेश्‍वरी मंडळ खामगावच्यावतीने सामाजिक बांधीलकी जपत १३८ दिव्यांगाना कृत्रिम पाय, कॅलिपर मोफत बसविण्यात आले. या शिबिराचा समारोप रविवारी स्थानिक दे.खि. मंगल कार्यालयात उत्साहा त पार पडला. या कार्यक्रमाचे अध्यक्षस्थानी बुलडाणा अर्बनचे संस्थापक अध्यक्ष राधेश्याम चांडक तर मुख्य अतिथी म्हणून महाराष्ट्र अँड गोवा बार कौन्सीलचे माजी अध्यक्ष अँड.मोतीसिंह मोहता अकोला व अखिल भारतवर्षीय माहेश्‍वरी युवा संगठनाचे राष्ट्रीय कोषाध्यक्ष दत्तप्रसाद तोतला, परळी वैजनाथ हे उपस्थित होते. यावेळी मंचावर समाजाचे अध्यक्ष प्रकाश राठी, महिला मंडळ अध्यक्षा निता चांडक, बहूबेटी मंडळ अध्यक्षा कु.हर्षा राठी, युवक मंडळाचे सचिव कौस्तुभ मोहता, महेश सेवा समितीचे संयोजक कृष्णकांत भट्टड, प्रकल्प अधिकारी विवेक मोहता सह प्रकल्प अधिकारी आनंद झंवर, अनुप टावरी तसेच विदर्भ प्रादेशिक माहेश्‍वरी युवा संगठनाचे प्रदेश मंत्री गोपाल तोष्णीवाल प्रामुख्याने उपस्थित होते. यावेळी उपस्थित मान्यवरांची समयोचित भाषणे झाली. उपस्थितांनी माहेश्‍वरी मंडळाच्या या जनउपयोगी प्रकल्पासाठी मंडळाचे कौतुक केले. यावेळी १२0 दिव्यांगांना एक पाय तर ९ दिव्यांगांना दोन पाय असे एकुण १३८ कृत्रिम पाय/ कॅलीपर नि:शुल्क प्रदान करण्यात आले. मंगल कार्यालयाच्या सभागृहात दिव्यांगांना पाय लावून चालविण्यात आले यावेळी दिव्यांग बंधुंच्या डोळ्यामध्ये आनंदाश्रू आले व त्यांनी आयोजकांचेआभार मानले. संचालन व आभार प्रदर्शन समाजाचे सचिव संजय सातल यांनी केले. सर्व दिव्यांग बंधुचे पायाचे माप ५ जानेवारी रोजी माहेश्‍वरी भवन खामगाव येथे घेण्यात आले व त्यांचे पाय अथवा कॅलीपर सिलीगुडी प.बंगाल येथून आलेल्या चमुने माहेश्‍वरी भवन येथेच बनविले. प्रकल्प यशस्वीतेकरीता माहेश्‍वरी महिला मंडळ, बहू बेटी मंडळ, युवक मंडळ, महेश सेवा समिती, महेश परिवार, खामगाव माहेश्‍वरी समाज बांधव, दे.खि. मंगल कार्यालय, संचालक मंडळ, कृषी उत्पन्न बाजार समिती खामगाव, विचार सेवा समिती जळगाव जामोद, जिल्ह्यातील विविध संस्था आदींचे सहकार्य लाभले अशी माहिती सचिव सातल यांनी दिली.