खामगाव: खामगाव येथील कृषी उत्पन्न बाजार समितीचे माजी सभापती संतोष टाले यांच्यासह अनेकांनी शुक्रवारी, रात्री ८ वाजता नगर पालिकेत भाजपात प्रवेश केला. आमदार अ‍ॅड. आकाश फुंडकर यांच्या नेतृत्वात कार्यकर्त्यांनी भाजपात पक्षप्रवेश केला. ऐन विधानसभा निवडणूकीच्या तोंडावर काँग्रेसच्या काही पदाधिकाऱ्यांनी व कार्यकर्त्यांनी भाजपात प्रवेश केल्याने खामगाव मतदारसंघात काँग्रेस दुबळी होत असल्याची चर्चा आहे.
संतोष टाले यांच्यासह एनएसयुआयचे पदाधिकारी गौरव चौधरी, मराठा सेवा संघाचे माजी जिल्हाध्यक्ष प्रकाश टिकार, भारीप बमस माजी शहराध्यक्ष संजय शर्मा, मातंग समाजाचे युवा आघाडी जिल्हा कार्याध्यक्ष कृष्णा नातेकर, मनसे माजी जिल्हाध्यक्ष बाबा काळे, वकिल संघाचे उपाध्यक्ष अ‍ॅड. अभय मुंडे, उद्योजक योगेश जाधव या वेगवेगळ्या पक्षातील व सामाजिक संघटनांच्या पदाधिकाºयांसह २०० पेक्षा जास्त कार्यकर्त्यांनी भाजपात प्रवेश केला.
यावेळी भाजप सोशल मिडिया सेलचे प्रदेश कार्यकारीणी सदस्य सागर फुंडकर, न.प.उपाध्यक्ष मुन्ना पुरवार, भाजप शहराध्यक्ष संजय शिनगारे, तालुकाध्यक्ष शरदचंद्र गायकी, पंचायत समिती सभापती उर्मिला गायकी, नगरसेवक सतिषआप्पा दुडे, भाजपा युवामोर्चा शहराध्यक्ष राम मिश्रा यांच्यासह भाजपा तालुका, शहर कार्यकारीणी सदस्य व कार्यकर्ते उपस्थित होते.