बायोमेट्रिक यंत्रणेचा अभाव

कर्मचा-यांत येईल वक्तशीरपणा; जिल्ह्यात जि.प.च्या १४४९ शाळा.

नाना हिवराळे / खामगाव: कर्मचारी व अधिकार्‍यांच्या कामात शिस्तबद्ध व वक्तशीरपणा यावा यासाठी शासकीय कार्यालयांमध्ये बायोमेट्रिक यंत्रणा प्रणाली अमलात आली आहे; परंतु जिल्हा परिषदेच्या शाळांमध्ये अद्यापही या यंत्रणेचा अभाव दिसून येत आहे. जिल्हय़ातील १४४९ शाळांमध्ये बायामेट्रिक यंत्रणेची गरज आहे. राज्यात ई-प्रशासन अधिक सक्षम करण्यासाठी शासनाच्या प्रत्येक विभागात प्रशासकीय यंत्रणा हायटेक होत आहे. प्रत्येक शासकीय कार्यालयामध्ये काम करणारे कर्मचारी व अधिकारी वेळेवर कामावर हजर व्हावेत, याची नोंदणी होण्यासाठी बायामेट्रिक यंत्रणा (थंब) कार्यान्वित करण्यात आली आहे. जिल्हा परिषदेच्या जवळपास सर्वच विभागामध्ये बायोमेट्रिक यंत्रणेचा उपयोग होतो; परंतु जिल्हा परिषदेच्या शाळांमध्ये या यंत्रणेचा अभाव प्रकर्षाने दिसुन येत आहे. बुलडाणा जिल्हय़ातील तेराही तालुक्यांमध्ये जिल्हा परिषदेच्या एकूण १४४९ शाळा आहेत. यामध्ये ३५ शाळा हायस्कूल आहेत. मराठी माध्यमांच्या प्राथमिक शाळांची संख्या ७७९ तर पूर्व माध्यमिक शाळा ५१३ आहेत. मराठी प्राथमिक शाळेवर ४ हजार ४२७ तर पूर्व माध्यमिक शाळेवर १ हजार १४७ शिक्षक कार्यरत आहेत. उपरोक्त दोन्ही शाळेवर ३६८ मुख्याध्यापक कामकाज सांभाळतात. उर्दू माध्यमाच्या प्राथमिक शाळा ६३ तर माध्यमिक ५९ शाळा आहेत. उर्दू प्राथमिक शाळेवर ४८७ शिक्षक तर माध्यमिक शाळेवर १७९ शिक्षक कार्यरत आहेत. या शाळावर ४५ मुख्याध्यापकांची पदे आहेत. ग्रामीण भागातील जिल्हा परिषदेच्या शाळांची शिक्षणाची अवस्था दयनीय असल्याची स्थिती निर्माण झाली आहे. कॉन्व्हेंट संस्कृतीच्या युगात प्रत्येक पालक आपला पाल्य इंग्रजीतून शिकावा यासाठी कॉन्व्हेंटकडे धाव घेत आहेत. गावागावात आता कॉन्व्हेंट शाळांचे जाळे पसरले आहे. या वाढत्या शाळामध्ये जिल्हा परिषदेची विद्यार्थी संख्या रोडावली आहे.