बुलडाणा - जिल्ह्याच्या मेहकर तालुक्यातील पाथर्डी येथे रात्रीच्या सुमारास घरातील एका सिलेंडरचा अचानक स्फोट झाला. या स्फोटानंतर पाहता-पाहता घराला आग लागली. घरातील सर्व सदस्य तातडीने बाहेर पडल्याने जिवितहानी टळली. मात्र, आग पसरत गेल्याने आणि आणखी 2 सिलेंडरचा स्फोट झाल्याने तीन झोपड्या जळून खाक झाल्या आहेत.
आग विझवण्यासाठी ग्रामस्थांनी अतोनात प्रयत्न केले. मात्र, आग भडकत गेली. आगीने रौद्ररुप धारण केल्याने आजूबाजूच्या घरात देखील आग पसरली होती. त्यातच, त्या घरातील दोन सिलेंडरचा स्फोट झाल्याने पुन्हा भीषण आग पसरली. यावेळी तातडीने मेहकर येथील अग्निशमन दलास पाचारण करण्यात आले. अग्निशमन विभागानेही तात्काळ घटनास्थळी धाव घेत आगीवर नियंत्रण मिळवले आहे. मात्र, तोपर्यंत सर्व जळून खाक झाले होते. या घटनेत लाखो रुपयांची हानी झाल्याचा प्राथमिक अंदाज वर्तविण्यात आला आहे. तर, ग्रामस्थांना आग आटोक्यात आणण्याच्या प्रयत्नात रात्र जागून काढावी लागली.