Buldhana Crime: बुलढाणाच्या खामगाव तालुक्यातील शंकरनगर भागात मुलाने जन्मदात्या बापाला संपवण्याचा प्रयत्न केला. मुलाने वडिलांना सतत मारहाण करत अखेर विष पाजण्याचा प्रयत्न केला. या प्रकरणी मुलाविरुद्ध खामगाव शहर पोलिस ठाण्यात २३ ऑगस्ट रोजी गुन्हा दाखल करण्यात आला आहे. ही धक्कादायक घटना ४ ते ६ ऑगस्ट दरम्यान घडली. त्यानंतर इतक्या दिवसांनी ही घटना समोर आली आहे.
प्रल्हाद मधुकर उमाळे (५०) हे शंकरनगर येथे पत्नीसमवेत राहतात. त्यांचा मुलगा शुभम प्रल्हाद उमाळे (२४) हा वारंवार वाद घालत त्यांना त्रास देत असे. ४ ऑगस्ट रोजी दुपारी प्रल्हाद उमाळे पत्नीला किरकोळ खर्चासाठी पैसे देत असताना शुभमने संतापून वडिलांना मारहाण केली. त्यानंतर संध्याकाळी पुन्हा त्याने वडिलांवर हल्ला केला.
५ ऑगस्ट रोजी सकाळी सात वाजताच्या सुमारास आरोपी शुभम हा मद्यधुंद अवस्थेत घरी आला व शिवीगाळ करून वडिलांना मारहाण केली. दरम्यान, जखमी प्रल्हाद उमाळे यांना पत्नीने सरकारी रुग्णालयात नेले. त्यानंतर त्यांनी पोलिस ठाण्यात तक्रार नोंदवली आणि ते घरी आले.
आपल्या विरोधात तक्रार दिल्याची माहिती कळताच आरोपी शुभम संतापला. त्याने ५ ऑगस्टच्या रात्री पुन्हा वडिलांना मारहाण केली. शुभमचा राग अजूनही गेला नव्हता. एवढ्यावर न थांबता त्याने ६ ऑगस्ट रोजी सकाळी आठ वाजता वडील घरी झोपलेले असताना त्यांच्या छातीवर पाय ठेवून गळा दाबला आणि जबरदस्तीने विष पाजलं. त्यामुळे त्यांना विषबाधा झाली आणि उपचारांसाठी रुग्णालयात दाखल करण्यात आलं.
दरम्यान, याप्रकरणी पोलिस तक्रार आणि तक्रारदारांच्या जबाबावरून शुभम उमाळे याच्याविरुद्ध २३ ऑगस्ट रोजी कलम १०९(१), ११५(२), ३५२, ३५१ (१) (२) भादंवि अन्वये गुन्हा दाखल करण्यात आला आहे. पोलीस या प्रकरणाचा पुढील तपास करत आहेत.