फेरीवाल्यांचे बायोमेट्रिक सर्वेक्षण

नांदुरा पालिकेद्वारे होणार सर्वेक्षण; बँकेमार्फत आर्थिक मदतही मिळणार.

किशोर खैरे / नांदुरा ( जि. बुलडाणा) : नांदुरा शहरात जे नागरिक रस्त्यावर बसून व्यवसाय करीत आहेत तसेच रेगडीवर, सायकलवर गावात हिंडून किंवा बाजारात बसून व्यवसाय करतात अशा छोट्या व्यवसाईकदारांचा नांदुरा नगरपालिके मार्फतबायोमेट्रीक पध्दतीने सर्व्हे करीत असल्याची माहिती प्रकल्पाच्या सहसंचालिका सौ. वैशाली पहुरकर यांनी ह्यलोकमतह्णशी बोलतांना दिली. राष्ट्रीय व राज्य नागरी उपजिवीका अभियाना अंतर्गत हे सर्वेक्षण होत आहे. शहरातील फेरीवाल्यांना त्यांची शैक्षणिक पात्रता, र्मयादीत कौशल्य, आर्थिक पत यामुळे व्यवसायाच्या संधी कमी असतात तसेच असंघटीत व स्वयंरोजगार करणार्‍या फेरीवाल्यांना व्यवसायाची संधी मिळावी. त्यात प्रामुख्याने शहर फेरीवाला समिती स्थापन करणे, फेरीवाल्यांचे सर्व्हेक्षण करुन ओळखपत्र देणे, आराखडा तयार करणे, फेरीवाल्यांना पायाभूत सुविधा देणे, फेरीवाल्यांना प्रशिक्षण देवून त्यांचे कौशल्याचा विकास करणे, वित्तीय समायोजन करणे, समाजात पत सुधारणे, सामाजिक सुरक्षा योजनांची सांगड घालणे असे या योजनेचे स्वरुप आहे. फेरीवाल्यामध्ये स्थिर फेरीवाला व फिरता फेरीवाला असे प्रकार असतील. स्थिर फेरीवाले ज्या जागेवर व्यवसाय करतात त्यांना तेथेच व्यवसायाकरिता जागा द्यावी, त्यांना आर्थिक मदत देवून पाणीपुरवठा, दिवाबत्ती, स्वच्छतागृहे, कचराकुंड्या, रात्री माल साठविण्यासाठी संयुक्त गोदामाची व्यवस्था, तात्पुरते शेड, वाहनतळ, विशीष्ट व्यवसायाकरिता विशेष रंगाच्या गाड्या उपलब्ध करुन देण्यात येतील. फेरीवाल्याचे प्रशिक्षण शिबिर घेवून त्यांचे हक्क, जबाबदार्‍या, विशेष धोरणे, अन्न सुरक्षा, स्वच्छता याबाबत माहिती देण्यात येईल. या प्रशिक्षणासाठी येणारा खर्च शासन करेल. नांदुर्‍यात मेन रोडवर बसून विक्री करणार्‍या छोट्या व्यावसायीकांना पोलिसांकडून नेहमीच त्रास दिला जातो अशी ओरड ते व्यवसायीक नेहमी करतात. परंतु या नवीन नियमानुसार त्यांना जागा मिळणार असल्याने आता पोलिसांचा ससेमिराही मागे राहणार नाही.