हातभट्टी दारू व्यवसायावर उत्पादन शुल्क विभागाची टाच

जिल्ह्यात हातभट्टी दारूचा सुळसुळा असल्याने तरुणांपासून वयोवृद्धापर्यंत व्यसनाच्या आहारी गेले आहेत. यामुळे राज्य उत्पादन शुल्क विभागाने ११ बेवारस गुन्हे नोंदविले आहे. या कारवाईमध्ये ९७४ लिटर हातभट्टी दारू, १७ हजार ४२९ लिटर रसायन, ३०६.५९ लिटर देशी दारू व ६.८४ लिटर विदेशी दारू, तसेच २५ लिटर ताडी जप्त केली आहे. या मोहिमेमध्ये अवैध मद्य वाहतूक अथवा विक्री करणारे एकूण नऊ वाहने जप्त करण्यात आली आहे. त्यापैकी ८ दुचाकी व १ तीनचाकी वाहन आहे. जप्त वाहनांची एकूण किंमत ४ लाख ५१ रुपये आहे. तसेच वाहनाखेरीज इतर जप्त मुद्देमालाची किंमत ५ लाख ६१ हजार ३८० रुपये रुपये एवढी आहे. एकूण जप्त मुद्देमालाची किंमत १० लाख १२ हजार ३८० रुपये इतकी आहे.

यांच्यावर करण्यात आल्या कारवाया

मोहिमे दरम्यान ८ सप्टेंबरला बिबी मेहकरचे दुय्यम निरीक्षक एस. डी. चव्हाण यांनी एक वारस गुन्हा नोंदवून ४७ हजार ९३० रुपयांचा मुद्देमाल जप्त केला आहे. त्यामध्ये ४५ हजार रुपये किमतीची एक दुचाकी आहे. तसेच ११ सप्टेंबरला मलकापूर तालुक्यातील झोडगा शिवारात दुय्यम निरीक्षक अमित अडळकर यांनी एक वारस गुन्हा नोंदवून ३७ हजार २०० रुपये किमतीचा मुद्देमाल जप्त केला आहे. यामध्ये ३६ हजार रुपये किमतीच्या दुचाकीचा समावेश आहे. त्याचप्रमाणे पिंपळगाव काळे शिवारात एक वारस गुन्हा नोंदवीत ७० हजार ७६० रुपयांचा मुद्देमाल जप्त केला आहे. त्यामध्ये ६५ हजार रुपये किमतीची एक दुचाकी आहे. तसेच गव्हाण फाटा येथे एक वारस गुन्हा नोंदविला आहे. या ठिकाणी ७१ हजार ५४० रुपये किमतीचा मुद्देमालामध्ये ६० हजार रुपये किमतीची दुचाकीही जप्त केली आहे. मलकापूर तालुक्यातील हरसोडा जुने येथे एक वारस गुन्हा नोंदवित ७० हजार ५५० रुपये किमतीचा मुद्देमाल जप्त केला आहे. त्यामध्ये ६५ हजार रुपये किमतीची दुचाकी आहे.

ही टीम करीत आहे कारवाई

जिल्ह्यात सुरू असलेल्या या मोहिमेमध्ये नागपूरचे विभागीय उपआयुक्त मो. सु. वर्धे, अधीक्षक भाग्यश्री पं. जाधव यांच्या मार्गदर्शनाखाली निरीक्षक जी. आर. गावंडे, दुय्यम निरीक्षक एन. के मावळे, आर. के. फुसे, अमित अडळकर, रविराज सोनुने, एस. डी. चव्हाण, आर. आर. उरकुडे, वा. रा. बरडे, पी. व्ही. मुंगडे व सर्व जवान, जवान नि वाहनचालक ही टीम सध्या जिल्हाभरात हातभट्टी दारू विक्रीचे समूळ उच्चाटन करण्यासाठी कार्यान्वित करण्यात आली आहे.