औषध फवारणीच्या दक्षतेविषयी शेतकऱ्यांना मार्गदर्शन

फवारणी करताना गळके फवारणी यंत्र वापरू नये. फवारणीच्या वेळी संरक्षक कपडे, हातमौजे, मास्क यांचा वापर करावा. तणनाशक व कीटकनाशक फवारणीसाठी वेगवेगळ्या पंपाचा वापर करावा. कीटकनाशके ही लहान मुले, खाद्यपदार्थ तसेच गुरांपासून दूर ठेवावे. हवेच्या विरुद्ध दिशेने फवारणी करू नये तसेच फवारणी करताना धूम्रपान वगैरे करू नये. फवारणीचे मिश्रण काठीच्या साहाय्याने करावे. कीटकनाशकांच्या बाटल्या वापरानंतर जमिनीत गाडून नष्ट कराव्यात. फवारणी झाल्यानंतर स्वच्छ पाण्याने अंघोळ करून कपडे स्वच्छ धुवावेत इत्यादी गोष्टींचे महत्त्व पटवून दिले. त्याचबरोबर विषबाधेची लक्षणे जसे की, चक्कर येणे, घाम येणे, उलटी, मळमळ, डोके दुखणे, पोट दुखणे, बेशुद्ध पडणे अशी लक्षणे जाणवल्यानंतर करावयाच्या उपाययोजना वा प्रथमोपचारही सांगितले. यावेळी अंकुश मेहेत्रे व इतर शेतकरी उपस्थित होते. तसेच महाविद्यालयाचे प्राचार्य नितीन मेहेत्रे, रावे समन्वयक मोहजीतसिंग राजपूत आणि कीटकशास्त्र विभागाचे प्रमुख प्रा. विलास चव्हाण व प्रा. मंगेश धांडे यांचे मार्गदर्शन लाभले.