दहावीच्या विद्यार्थ्यांचे क्रीडापाठोपाठ रेखाकलेचे गुण गेले ! - A

विद्यार्थ्यांच्या कलागुणांना वाव मिळावा, यासाठी दरवर्षी एलिमेंट्री आणि इंटरमिजिएट रेखाकला परीक्षा घेतल्या जातात. या दोन्ही परीक्षा उत्तीर्ण असलेल्या विद्यार्थ्यांना ग्रेडनुसार दहावी बोर्ड परीक्षेत गुण दिले जातात. मात्र, यंदा कोरोनामुळे रेखाकलेच्या दोन्ही परीक्षा झालेल्या नाहीत. त्यामुळे दहावीच्या वर्गातील चित्रकलेची अंतिम परीक्षा देणाऱ्या विद्यार्थ्यांना गुण मिळणार नाहीत. दरम्यान, अनेक विद्यार्थी सातवी आणि आठवीच्या वर्गातच या परीक्षा देतात. त्यामुळे त्यांना तरी चित्रकला गुण द्यावेत, अशी मागणी कलाशिक्षकांमधून होत आहे. जिल्ह्यातून चित्रकला गुणांसाठी अनेक विद्यार्थ्यांचे प्रस्ताव बोर्डाकडे दाखल झाले आहेत. पुढील कार्यवाहीसाठी ते राज्य मंडळाकडे पाठविण्यात आले आहेत. त्यामुळे रेखाकलेचे गुण मिळणार की नाही, याबाबत विद्यार्थी, कलाशिक्षकांमध्ये संभ्रम आहे.

ग्रेडनुसार मिळणारे गुण

ए-७

बी-५

सी-३

दरवर्षी चित्रकलेची परीक्षा घेतली जाते. हजारो विद्यार्थी यामध्ये सहभागी होतात. दोन सत्रांत परीक्षा असल्याने विद्यार्थ्यांना प्रतिसाद चांगला असतो. मागील दोन वर्षांत ज्या विद्यार्थ्यांनी परीक्षा उत्तीर्ण केली आहे, त्यांचे प्रस्ताव बोर्डाकडे सादर केले आहेत. त्यामुळे विद्यार्थ्यांवर अन्याय न करता रेखाकलेचे गुण देण्यात यावेत. कोरोनामुळे विद्यार्थ्यांचे शैक्षणिक नुकसान झाले आहे. विद्यार्थ्यांचा विचार करता रेखाकला परीक्षा उत्तीर्ण विद्यार्थ्यांना गुण देण्यात यावेत.

-विवेक नागरिक, कलाशिक्षक

आम्ही रेखाकलेच्या दोन्ही परीक्षा उत्तीर्ण केल्या आहेत. बोर्डात शाळेच्या वतीने प्रस्ताव सादर केले आहेत. त्यामुळे गुण देण्यात यावेत. गुण मिळाल्यास विद्यार्थ्यांना फायदा होणार आहे.

-धीरज सरनाईक, विद्यार्थी

चित्रकलेच्या दोन्ही परीक्षा उत्तीर्ण असलेल्यांनी गुणांसाठी प्रस्ताव दाखल केले आहेत. अनेकजण दहावीच्या वर्गात असताना चित्रकलेची अंतिम परीक्षा देणार होते. मात्र, कोरोनामुळे चित्रकला परीक्षा होऊ शकली नाही. यामुळे विद्यार्थ्यांचे नुकसान होत आहे.

-पायल इंगळे, विद्यार्थिनी