जिल्ह्यात कोरोना संसर्ग ओसरल्यानंतरही ८२ टक्के शाळा बंदच

बुलडाणा : ग्रामीण भागातील माध्यमिक शाळा सुरू असून, शहरात मात्र संस्थाचालकांना अद्यापही शाळा सुरू करण्याच्या आदेशाची प्रतीक्षा आहे. जिल्ह्यात कोरोना संसर्ग ओसरल्यानंतरही ८२ टक्के शाळा बंदच आहेत. कोरोना रुग्ण नसलेल्या शहरात ऑफलाईन शिक्षण केव्हा सुरू होणार, असा प्रश्न पालकांमधून उपस्थित होत आहे.

कोरोनामुक्त झालेल्या गावांमध्ये आठवीनंतरचे वर्ग सुरू करण्यात आलेले आहेत. ग्रामीण भागातील माध्यमिक शाळा सुरू होऊन अडीच महिने उलटले आहेत. कोरोनाचा प्रादुर्भावदेखील कमी झाला आहे, तरीही जिल्ह्यातील शहरातील शाळांमध्ये अजूनही ऑनलाईन शिक्षण सुरू आहे. विद्यार्थ्यांना ऑफलाईन पद्धतीने शिक्षण देण्याबाबत राज्य शासनाच्या आदेश आणि शिक्षण विभागाच्या सूचना नसल्याने शाळांची अडचण झाली आहे. त्यांना आदेशाची प्रतीक्षा लागली आहे. कोरोना कमी झाला असल्याने प्रत्यक्षात वर्ग भरविण्याची मागणी पालकांकडून होत आहे.

ऑनलाईन शिक्षणाला विद्यार्थी कंटाळले

दीड वर्षांपासून ऑनलाईन शिक्षण सुरू आहे. ऑनलाईन शिक्षणात मुलांना एकाच खोलीत मोबाईलसमोर दिवसभर बसून ठेवण्यात येत आहे. शहरी भागातील विद्यार्थी ऑनलाइन शिक्षणाला कंटाळले असून त्यांना ऑफलाईन शिक्षणाची प्रतीक्षा आहे.

ग्रामीण भागात विद्यार्थ्यांचा प्रतिसाद

ज्या गावांमध्ये कोरोनाचा प्रादुर्भाव कमी झाला आहे, तेथील पालकांची संमती अथवा हमीपत्रे घेऊन आठवी ते बारावीचे वर्ग सुरू करण्याची सूचना शाळांना केली. त्यानुसार गेल्या अडीच महिन्यांपूर्वी जिल्ह्यातील ग्रामीण भागातील माध्यमिक शाळांमधील वर्ग सुरू झाले. टप्प्या-टप्प्याने वर्ग सुरू करणाऱ्या शाळांची संख्या वाढत आहे. ग्रामीण भागातील शाळांना विद्यार्थ्यांचा प्रतिसाद मिळत आहे.

आतापर्यंत ४८३ शाळांची घंटा वाजली

गेल्या अडीच महिन्यांत जिल्ह्यातील ४८३ माध्यमिक शाळांची घंटा वाजली आहे. या शाळांमध्ये इयत्ता आठवी ते बारावीचे वर्ग कोरोना नियमांचे पालन करत भरले आहेत. सुरू झालेल्या माध्यमिक शाळा ह्या ग्रामीण भागातीलच आहेत. या शाळांनी दोन्ही पद्धतीने शिक्षण सुरू ठेवले आहे.

शहरातील शाळांबाबत आदेश नाही

ग्रामीण भागातील ४८३ शाळा सुरू आहेत. शहरातील शाळा सुरू करण्याबाबत अद्याप कुठलाच आदेश नाही. त्यामुळे सध्या शहरात ऑनलाईन शिक्षण सुरू आहे.

सचिन जगताप, प्राथमिक, शिक्षणाधिकारी बुलडाणा.

जिल्ह्यातील एकूण शाळा : २७००

सुरू झालेल्या शाळा : ४८३

जिल्हा परिषद शाळा : १४८३

नगरपालिका शाळा : १०५

अनुदानित : ५१५