नोटाबंदीच्या निषेधार्थ काँग्रेसचा घंटानाद

बुलडाणा, धाड, पाडळी, चिखली, मेहकर, जानेफळ, धामणगाव येथे आंदोलन

बुलडाणा, दि. 0९- अखिल भारतीय काँग्रेस कमिटी व महाराष्ट्र प्रदेश काँग्रेस कमिटी आणि बुलडाणा जिल्हा काँग्रेस कमिटीच्या निर्देशानुसार बुलडाणा शहर काँग्रेस कमिटीचे अध्यक्ष अँड. शरद राखोंडे यांच्या नेतृत्वात येथील स्टेट बँकसमोर ९ जानेवारी रोजी घंटानाद आंदोलन करण्यात आले. मोदी सरकारने ५00 आणि १000 रुपयांच्या नोटा अचानक रद्द केल्याने शेतकरी, शेतमजूर, मध्यमवर्गीय व्यापारी व जनतेला प्रचंड मनस्ताप सहन करावा लागत आहे. त्यामुळे नोटाबंदीचा अखिल भारतीय काँग्रेस पक्षाच्यावतीने जाहीर निषेध करण्यात आला. त्यानंतर विविध मागण्यांचे निवेदन बँक व्यवस्थापक कुलकर्णी यांना देण्यात आले. त्यात नवीन नोटा मुबलक प्रमाणात उपलब्ध कराव्यात, रिझर्व्ह बँकेने त्वरित प्रतिबंध हटवावे, जनधन योजनेमध्ये खात्यात जमा झालेली रक्कम नागरिकांना काढण्याचा अधिकार द्यावा, धनादेशाद्वारे मिळणार्‍या रकमेतून कपात करू नये आदी मागण्या नमूद करण्यात आल्या. यावेळी आंदोलनात विजय अंभोरे, अँड. जयश्री शेळके, सतीश मेहेंदरे, दीपक रिंढे, राजीव काटीकर, दिलीप जाधव, सुनील तायडे, अँड. शरद राखोंडे, पुरुषोत्तम देवकर, सुनील सपकाळ, अँड. सतीशचंद्र रोठे, मोईन काझी, नाजूकराव जाधव, गोपालसिंह राजपूत हरणखेडकर, गौतम मोरे, संदीप बिलारी, पी. डी. महाले, यशपाल ठाकूर, योगेश परशे, राकेश गाडपकर, शेख बब्बू, फिरोज चौधरी, ज्योत्स्ना जाधव आणि बानोबी चौधरी आदी उपस्थित होते. चिखली शहर काँग्रेस कमिटीच्यावतीने शहराध्यक्ष अतहरोद्दीन काझी यांच्या नेतृत्वात घंटा नांद आंदोलन तसेच नोटाबंदीमुळे भाजीपाल्याचे भाव गडगडल्याने भाजीपाला उत्पादक शेतकर्‍यांना होणारा त्रास दूर करण्यात यावा, यासाठी भाजीपाला आंदोलन ९ जानेवारी रोजी करण्यात आले. मेहकर शहर काँग्रेस कमिटीच्यावतीने केंद्र सरकारने नोटाबंदीचा चुकीच्या घेतलेल्या निर्णयाविरोधात शहरातील सर्व शासकीय बँकांसमोर घंटानाद आंदोलन करुन शाखा व्यवस्थापकांना मागण्यांचे निवेदन देण्यात आले. यावेळी विविध बँकेच्या शाखांसमोर घंटानाद आंदोलन करण्यात आले.