मोहाडी तालुक्यातील रेतीघाटांवर तस्करांचा ठिय्या

मोहाडी तालुक्यातून वैनगंगा नदी वाहते. या नदीतील रेतीला सर्वत्र मोठी मागणी आहे. त्यामुळेच रेती तस्करांनी गत काही वर्षांपासून आपला मोर्चा रेतीघाटांवर वळविला आहे. तालुक्यातील घाटांवर पहाटेपासून उशिरा रात्रीपर्यंत जेसीबीच्याद्वारे रेतीचे उत्खनन केले जाते.

ठळक मुद्देअद्याप लिलावच झाले नाही : सुकळी, ब्राम्हणी, चारगाव, ढोरवाडा घाटावर धुमाकूळ

लोकमत न्यूज नेटवर्क
आंधळगाव : वैनगंगेच्या रेतीला विदर्भात मोठी मागणी असल्याने मोहाडी तालुक्यातील रेती घाटावर तस्करांचा धुमाकूळ सुरु आहे. लिलाव झाले नसतानाही सुकळी, ब्राम्हणी, चारगाव, ढोरवाडा घाटावर रेतीचे खुलेआम उत्खनन होत आहे. या सर्व प्रकाराकडे महसूल विभाग जाणीवपूर्वक दुर्लक्ष करीत आहे.
मोहाडी तालुक्यातून वैनगंगा नदी वाहते. या नदीतील रेतीला सर्वत्र मोठी मागणी आहे. त्यामुळेच रेती तस्करांनी गत काही वर्षांपासून आपला मोर्चा रेतीघाटांवर वळविला आहे. तालुक्यातील घाटांवर पहाटेपासून उशिरा रात्रीपर्यंत जेसीबीच्याद्वारे रेतीचे उत्खनन केले जाते. विना क्रमांकाच्या ट्रक आणि ट्रॅक्टरद्वारे ही रेती भंडारा मार्गे नागपूर, पारडी, रामटेक, मौदा येथे विकली जाते. वैनगंगेच्या सुकळी, ब्राम्हणी, चारगाव, ढोरवाडा, रोहा, बेटाळा घाटावर सध्या मोठ्या प्रमाणात उत्खनन सुरु आहे. नदीच्या तिरावरच रेतीचे साठे तयार केले जात आहे. येथून वाहनाद्वारे वाहतूक केली जाते. मोठ्या शहरामध्ये त्याची विक्री होत आहे.
सध्या एकाही घाटाचा लिलाव झाला नाही. त्यामुळे शासनाला कोणतीही रक्कम न भरता रेतीची तस्करी केली जात आहे. मात्र या सर्व प्रकारात महसूल विभाग आपले उखळ पांढरे करुन घेत आहे. तलाठी मंडळ अधिकारी यांना हाताशी धरुन रेतीचा सपाटा लावला आहे. गत महिन्याभरापासून रेती तस्करांचा धुळगूस सुरु असून यामुळे शासनाचा लाखो रुपयांचा महसूल बुडत आहे. उलट घरकुल योजनेच्या लाभार्थ्यांना रेती मात्र मिळत नाही.
रेती माफीयांनी अनेक गुंड प्रवृत्तीचा तरुणांना हाताशी धरले आहे. त्यामुळे स्थानिक गावकऱ्यांनी विरोध केला तरी ते कुणाला जुमानत नाही. सदर तरुण पोलीस आणि महसूल विभागाच्या अधिकाऱ्यांवर लक्ष केंद्रीत करुन असतात.
रेती घाटांकडे कुणी येत असल्यास त्याची माहिती तात्काळ मोबाईलवरुन संबंधित वाहनचालकांना दिली जाते. यामुळे एखाद्या प्रामाणिक अधिकाऱ्याने कारवाईचा प्रयत्न केला तरी तो यशस्वी होत नाही.

कर्मचाऱ्यांची वाहने तस्करीत
तुमसर-मोहाडी तालुक्यात रेती व्यवसाय सोन्याची अंडे देणारी कोंबडी ठरली आहे. त्यामुळे अनेकजण या व्यवसायात उतरले आहे. महसूल व पोलिसातील अनेक कर्मचाºयांनी वाहने घेऊन या व्यवसायात उतरविल्याची माहिती आहे. वाहनाच्या मुळ मालकांचा शोध घेतल्यास अनेक धक्कादायक प्रकार बाहेर येण्याची शक्यता आहे. यात कर्मचारीच गुंतल्याने वरिष्ठ कारवाई करण्यास मागेपुढे पाहतात.