नोकर जेरबंद, ४२९ टायर जप्त

गोदामातून टायर चोरणाऱ्या नोकरासह त्याच्या साथीदाराला पोलिसांनी अवघ्या २४ तासात जळगाव जिल्ह्याच्या वरणगाव येथून जेरबंद केले. त्याच्याजवळून ४२९ टायरसह ट्रक जप्त करण्यात आला. सोमवारच्या रात्री नोकराने भंडारा येथील सहकार नगरातील जिंदल कॉम्प्लेक्समधील गोदामातून टायर चोरले होते.

ठळक मुद्देगोदामातील चोरीचे प्रकरण : जळगाव जिल्ह्याच्या वरणगावमधून दोघांना अटक

लोकमत न्यूज नेटवर्कभंडारा : गोदामातून टायर चोरणाऱ्या नोकरासह त्याच्या साथीदाराला पोलिसांनी अवघ्या २४ तासात जळगाव जिल्ह्याच्या वरणगाव येथून जेरबंद केले. त्याच्याजवळून ४२९ टायरसह ट्रक जप्त करण्यात आला. सोमवारच्या रात्री नोकराने भंडारा येथील सहकार नगरातील जिंदल कॉम्प्लेक्समधील गोदामातून टायर चोरले होते.शुभम अशोक तायडे (२१) रा.आहुजा नगर जळगाव हल्ली मुक्काम जवाहरनगर (भंडारा) आणि संभाजी पंडीत पाटील (५१) रा.मनुदेवी सोसायटी आहुजा नगर जळगाव असे अटकेतील आरोपींची नावे आहेत. साकोली येथील अरुण गंगासागर गुप्ता यांचे सहकार नगरातील जिंदल कॉम्प्लेक्समध्ये टायरचे गोदाम आहे. त्यांच्याकडे शुभम हा गत वर्षभरापासून नोकरीवर होता. दरम्यान अरुण गुप्ता तिरुपती बालाजी येथे दर्शनासाठी गेले होते. तेथून परत आल्यानंतर मंगळवारी आपले गोदाम उघडले असता गोदामातील सुमारे ५०० टायर लंपास झाल्याचे लक्षात आले. या प्रकाराने घाबरलेल्या गुप्ता यांनी थेट शहर पोलीस ठाणे गाठले. त्यांनी याप्रकरणी तक्रार दाखल केली. पोलिसांनी चोरीचा गुन्हा दाखल केला.गोदामातून एकाच वेळी पाचशेच्या आसपास टायर लंपास झाल्याने पोलिसांनी तपासाची चक्रे फिरविली. वेगवेगळ्या दिशेने तपास सुरु केला. घटनास्थळी भेट दिली असता सिसीटीव्ही कॅमेरे बंद असल्याचे दिसून आले. एक दिवसापूर्वीच सीसीटीव्ही कॅमेरे नोकराने बंद केल्याचे पुढे आले. त्यावरून शुभम तायडेवर संशय बळावला. त्यातच तो कामावरही हजर नसल्याचे दिसून आले. पोलिसांनी त्याच्या मोबाईलवर संपर्क साधला असता तो स्वीच आॅफ येत होता. ऐवढेच नाही तर पोलिसांनी तो राहत असलेल्या जवाहरनगर येथे जाऊन नातेवाईकांची विचारपूस केली. त्यामुळे शुभमवर पोलिसांचा संशय बळावला.पोलिसांनी या चोरट्यांचा शोध घेण्यासाठी दोन पथक तयार केले. तसेच शुभमच्या नातेवाईकांनी दिलेल्या माहितीवरून अकोला, बुलढाणा आणि जळगाव पोलिसांना या प्रकाराची माहिती दिली. तसेच येथून दोन पथक त्यांच्या मागावर निघाले. दरम्यान बुधवारी जळगाव जिल्ह्यातील वरणगाव बसस्थानक परिसरात हे दोघे ट्रक घेऊन जात असल्याची माहिती पोलिसांना मिळाली. त्यावरून स्थानिक पोलिसांच्या मदतीने ट्रक ताब्यात घेण्यात आला.शुभम व त्याचा साथीदार संभाजी या दोघांना अटक करून भंडारा येथे आणण्यात आले. त्यांनी ४२९ टायर चोरल्याचे लक्षात आले. सर्व टायर जप्त करण्यात आले असून या टायरची किंमत १७ लाख रुपये आहे. तसेच सात लाखांचा ट्रकही जप्त करण्यात आला. ही कारवाई जिल्हा पोलीस अधीक्षक विनिता साहू, अपर पोलीस अधीक्षक रश्मी नांदेडकर, उपविभागीय पोलीस अधिकारी संजय जोगदंड यांच्या मार्गदर्शनात स्थानिक गुन्हे शाखेचे प्रमुख रवींद्र मानकर, ठाणेदार सुधाकर चव्हाण यांनी केली. आरोपींच्या शोधात पोलीस उपनिरीक्षक अमरदीप खाडे, प्रशांत गुजर, पुरुषोत्तम शेंडे, अतुल मेश्राम, बापूूराव भुसावळे, अजय कुकडे, कृष्णा कातखेडे, संदीप बन्सोड, साजन वाघमारे यांचे पथक गेले होते. अवघ्या २४ तासात पोलिसांनी या चोरीचा छडा लावला.चोरट्याला टाकायचे होते दुकानवर्षभरापासून अरुण गुप्ता यांच्याकडे नोकर असलेल्या शुभम याला पोलिसांनी अटक केली. चोरी करण्यामागे कारण विचारले असता त्याने आपल्याला टायरचे दुकान टाकायचे होते. त्यासाठीच आपण चोरी केल्याचे पोलिसांपुढे कबुली दिल्याची माहिती जिल्हा पोलीस अधीक्षक विनिता साहू यांनी शहर ठाण्यात आयोजित पत्रपरिषदेत दिली. शुभमने अवघ्या एक ते दोन तासात हमालांच्या मदतीने ट्रकमध्ये टायर भरले. गुप्ता यांचा शुभम नोकर असल्याने परिसरातील कुणालाही ट्रकमध्ये टायर भरताना संशय आला नाही. मात्र मालक दर्शनावरून परत आल्यानंतर चोरीचे बिंग फुटले. दुकानाऐवजी आता शुभमला कारागृहाची हवा खावी लागणार आहे.