मुरूमासाठी नैसर्गिक टेकडी उद्ध्वस्त

दावेझरी शिवारात नैसर्गिक टेकडी आहे. या टेकडीच्या एका बाजूला गिट्टी काढण्यासाठी परवानगी गत अनेक वर्षांपासून केली जात आहे. टेकडीच्या दुसऱ्या बाजूला गट क्रमांक २६२ मध्ये मुरूम उत्खननाची परवानगी महसूल प्रशासनाने दिली आहे. एक ते सात गटात उत्खननाची परवानगी असून प्रत्येक गटात केवळ ५०० ब्रास मुरूम उत्खनन करण्याची परवागनी आहे.

ठळक मुद्देदावेझरी येथील प्रकार : नियंत्रणाअभावी शासकीय मालमत्तेची लूट, पर्यावरणाचा ऱ्हास

मोहन भोयर ।
लोकमत न्यूज नेटवर्क
तुमसर : रस्ता बांधकामासाठी लागणाऱ्या मुरूमाचे तालुक्यात मोठ्या प्रमाणात उत्खनन सुरू असून आता कंत्राटदाराने नैसर्गिक टेकडी उद्ध्वस्त करण्याचा सपाटा लावला आहे. तालुक्यातील दावेझरी येथील नैसर्गिक टेकडी उद्ध्वस्त करून हजारो ब्रास मुरूमाची उत्खनन करण्यात आले. नियंत्रणाअभावी शासकीय मालमत्तेची लूट होत असताना यावर बोलायला कुणीही तयार नाही.
दावेझरी शिवारात नैसर्गिक टेकडी आहे. या टेकडीच्या एका बाजूला गिट्टी काढण्यासाठी परवानगी गत अनेक वर्षांपासून केली जात आहे. टेकडीच्या दुसऱ्या बाजूला गट क्रमांक २६२ मध्ये मुरूम उत्खननाची परवानगी महसूल प्रशासनाने दिली आहे. एक ते सात गटात उत्खननाची परवानगी असून प्रत्येक गटात केवळ ५०० ब्रास मुरूम उत्खनन करण्याची परवागनी आहे. ६ डिसेंबर ते २५ जानेवारी या कालावधीत सातही गटातून मुरूमाचे उत्खनन करण्याची परवानगी दिली होती. शिवालय कंट्रक्शन कंपनीच्या नावाने ही परवानगी दिलेली आहे.
मिटेवानी येथील गट क्रमांक ७६६ येथूनही ५०० ब्रास मुरूमाची परवानगी सदर कंपनीला देण्यात आली. या गटातूनही नियमबाह्य उत्खनन केले जात आहे.
दावेझरी शिवारात एक मोठी टेकडी असून या टेकडीवर प्राचीन अवलीयाची समाधी आहे. तेवढा भाग सोडला तर आता संपूर्ण टेकडी उउद्ध्वस्त करण्यात आली आहे. अतिशय उच्च दर्जाचा मुरूम असल्याने मोठ्या प्रमाणात उत्खनन करण्यात आले.
दावेझरी टेकडी ही शासनाच्या मालकीची आहे. विशेष म्हणजे पर्यावरणाचा ऱ्हास होत असताना या प्रकाराकडे कुणाचेही लक्ष दिसत नाही. सर्व नियम पायदळी तुडवून ५० पट अधिक मुरूमाचे उत्खनन करण्यात आले आहे.

चिंचोली-तुमसर रस्त्यावर मुरूम
दावेझरी व मिटेवानी येथील उत्खनन केलेला मुरूम चिंचोली ते तुमसर रस्ता बांधकामासाठी वापरण्यात आला आहे. रस्ता हायब्रिड असल्याने पॉवर नियंत्रण करणारी स्वतंत्र एजन्सी आहे. स्थानिक बांधकाम विभाग त्याला जबाबदार नाही. मे गॉड ही एजन्सी यावर नियंत्रण ठेवत असल्याची माहिती आहे. रस्त्यात किती मुरूम वापरला याची माहिती मिळाल्यास यातील अनियमितता पुढे येणार आहे.

दावेझरी-मिटेवानी येथे मुरूम उत्खननाची परवानगी देण्यात आली आहे. ३५०० ब्रासपेक्षा जास्त मुरूमाचे उत्खनन झाल्यास चौकशी करण्यात येईल. अनियमितता आढळल्यास महसूल नियमानुसार कारवाई होईल.
-गजेंद्र बालपांडे, तहसीलदार.
चिंचोली-तुमसर दरम्यान रस्त्यावर किती मुरूमाचा वापर करण्यात आला. याची माहिती देण्यात येईल. सध्या मी बाहेर आहे. रस्त्याच्या मुरूमाचे रेकॉर्ड उपलब्ध आहे.
-राजेश खंडेलवाल, अभियंता मे गॉट एजन्सी.