मनसेचा ‘हल्लाबोल’

भंडारा उपवन संरक्षक कार्यालय व वनपरिक्षेत्र कार्यालयांतर्गत दहा महिन्यापूर्वी वृक्षांची कटाई करण्यात आली.

प्रकरण वृक्षकटाईचे : उपवनसंरक्षकांनी दिले निलंबनाचे आश्वासनभंडारा : भंडारा उपवन संरक्षक कार्यालय व वनपरिक्षेत्र कार्यालयांतर्गत दहा महिन्यापूर्वी वृक्षांची कटाई करण्यात आली. मात्र या कटाईला परवानगीच नसल्याची गंभीर बाब ‘लोकमत’ने उघडकीस आणली. या प्रकरणात दोषी वनपरिक्षेत्राधिकारी मेश्राम यांना निलंबित करावे या मागणीसाठी महाराष्ट्र नवनिर्मान सेनेचे जिल्हाध्यक्ष विजय शहारे यांच्या नेतृत्वात आज वनविभागावर हल्लाबोल करण्यात आला. ‘कुंपणच शेत खाते तेव्हा’ काहीसा असाच प्रकार मागील अनेक दिवसांपासून वनविभागात सुरु आहे. ज्या वनाधिकाऱ्यांवर वृक्ष जोपासण्याची जबाबदारी आहे त्यांनीच वनविभागाचा कायदा पायदळी तुडविल्याचा प्रकार समोर येत आहे. सुमारे दहा महिन्यापूर्वी भंडारा उपवनसंरक्षक कार्यालय व वनपरिक्षेत्राधिकारी कार्यालय परिसरात असलेले गगनचुंबी मौल्यवान साग व आडजात वृक्षांची कटाई केली. केवळ बारा झाडांच्या कटाईची परवानगी पालिका प्रशासनाने दिली असताना येथील वनपरिक्षेत्राधिकारी संजय मेश्राम यांनी आपल्या अधिकाराचा दुरुपयोग करीत या दोन्ही कार्यालयात लाखो रुपये किमतीच्या शेकडो झाडांची अक्षरश: कत्तल केली. यासोबतच कोका विश्रामगृहातील लाकूड साहित्यांचीही अफरातफर केल्याची बाब समोर आली आहे. एक ना अनेक प्रकरण चव्हाट्यावर येत असताना वनविभागाच्या वरिष्ठ अधिकाऱ्यांनी मेश्राम यांना पाठीशी घालण्याचा प्रकार चालविला. या प्रकरणाची श्रृंखलाच ‘लोकमत’ने लावून धरली आहे. दरम्यान महाराष्ट्र नवनिर्माण सेनेने मागील आठवड्यात या प्रकरणात दोषी असलेल्या वनपरिक्षेत्राधिकारी संजय मेश्राम यांच्यावर निलंबनाची कारवाई करावी अन्यथा मनसेस्टाईल आंदोलन करण्याचा इशारा उपवनसंरक्षक अतुल वर्मा यांना दिला होता. या उपरांतही कारवाई थंडबस्त्यात असल्याने आज मंगळवारला मनसेचे जिल्हाध्यक्ष विजय शहारे यांच्या नेतृत्वात सुमारे शंभरावर कार्यकर्त्यांनी उपवनसंरक्षक कार्यालयावर हल्लाबोल केला. यावेळी उपवनसंरक्षक अतुल वर्मा हे कार्यालयात उपस्थित नसल्याने संतप्त मनसैनिकांनी वनकार्यालयात घोषणाबाजी करून वनअधिकाऱ्यांचा निषेध केला. यावेळी त्यांनी वनविभागाचे मुख्य लेखापाल एस.डब्लू. बन्सोड यांना घेराव घातला. यानंतर भांबावलेल्या बन्सोड यांनी भ्रमणध्वनीवरून उपवनसंरक्षक अतुल वर्मा यांच्याशी संपर्क साधून मनसेच्या हल्लाबोल कार्यक्रमाची माहिती दिली. यावेळी त्यांनी मनसे पदाधिकाऱ्यांना आश्वासन दिले. यावेळी विजय शहारे यांच्यासह जिल्हा उपाध्यक्ष नितीन वानखेडे, चोपराम तिवाडे, ज्ञानेश्वर पोगडे, दिनेश बारापात्रे, सोमेंद्र शहारे, अभिषेक राजदेरकर, अतुल भिरे, प्रकाश कानतोडे, मनीष पडोळे, मिलिंद ठाकरे, नजीर बांते यांच्यासह कार्यकर्ते उपस्थित होते. (शहर प्रतिनिधी)उपवनसंरक्षकांनी दिले आश्वासनमहाराष्ट्र नवनिर्माण सेनेच्या पदाधिकाऱ्यांनी मनसेस्टाईल आंदोलनाचा इशारा दिला होता. मात्र आज आंदोलन होणार याची कल्पना उपवनसंरक्षक वर्मा यांना मिळाल्याची माहिती आहे. मनसैनिकांचा हल्लाबोल कार्यालया पोहचला तेव्हा ते उपस्थित नसल्याने मुख्य लेखापाल बन्सोड यांना घेराव घालण्यात आला. दरम्यान उपवनसंरक्षक वर्मा यांच्याशी आंदोलनकर्त्यांचा संपर्क झाला. त्यावेळी त्यांनी निलंबनाची कारवाई करण्याचे अधिकार माझ्याच क्षेत्रात नाही. मेश्राम यांच्या कार्यप्रणालीचा इत्यंभूत अहवाल मुख्य वनसंरक्षकांना तात्काळ पाठविण्यात येईल. त्यांच्यावर तात्काळ कारवाई करण्यासाठी पाठपुरावाही करण्यात येईल व कोणालाही कारवाईतून सोडणार नसल्याचे आश्वासन यावेळी मनसेचे शहारे यांना दिल्यानंतर आंदोलन मागे घेण्यात आले. उपवनसंरक्षक वर्मा यांची आंदोलनादरम्यान प्रत्यक्ष भेट होऊ शकली नाही. त्यांनी भ्रमणध्वनीवरून मेश्राम यांच्यावर कारवाई करण्याचे आश्वासन दिले. या आठवड्यात त्यांच्यावर निलंबनाची कारवाई न केल्यास वनविभागावर मनसे स्टाईल आंदोलन करण्यात येईल. -विजय शहारेजिल्हाध्यक्ष, मनसे, भंडारा