लाखनी : लाखनी तालुक्यातील चुलबंध नदीपात्रातील पळसगाव (को.) येथील रेतीघाटातून मागील वर्षीपासून सर्रास अहोरात्र अवैद्य रेतीचा उपसा राजकीय वरदहस्ताने महसूल व पोलीस विभागाच्या मोठमोठ्या अधिकारी व कर्मचाऱ्यांना चिरीमिरी देऊन राजरोसपणे भर चौकातून खुलेआम सुरू आहे.
पळसगाव (को.) रेतीघाटातील रेतीतस्करीला आळा घालण्यासाठी महसूल विभागाच्या वरिष्ठ अधिकाऱ्यांच्या आदेशानुसार ३१ डिसेंबर २०२० ला पळसगाव (को.) घाटाकडे जाणाऱ्या रस्त्यावर जे.सी.बी. यंत्राद्वारे मोठमोठ्या नाल्या खोदल्या होत्या. या नाल्या असल्याकारणाने रेतीघाटाकडे जाणारा रस्ता पूर्णपणे बंद होऊन रेतीचोरीला बराचसा आळा बसण्यास मदत झाली होती; परंतु ही खोदलेली नाली १९ जानेवारीला पूर्णतः बुजविल्याने या मार्गावरील रेतीची अवैध वाहतूक बिनधास्तपणे पुन्हा सुरू झाली असल्याची चिन्हे दिसू लागली आहेत.
पालांदूर परिसरातील चुलबंद नदीपात्रातील पळसगाव घाटात मोठ्या प्रमाणात दर्जेदार रेती साठा असून, येथील रेती तालुकाभर प्रसिद्ध आहे.
सध्या रेतीघाटांचे लिलाव झाले नसल्याने रेती चोरी जाऊ नये व रेतीच्या अवैध उत्खनन व वाहतुकीला आळा बसावा याकरिता पालांदूर (चौ.) महसूल मंडळाचे मंडळ अधिकारी राकेश पंधरे व कोलारी साझा क्र. २२ चे तलाठी के.बी. मेश्राम व इतर कर्मचाऱ्यांनी वरिष्ठ अधिकाऱ्यांच्या आदेशानुसार ३१ डिसेंबर २०२० ला पळसगाव (को.) येथील घाटाकडे जाणाऱ्या शिवारात मोठी व रुंद नाली खोदली. रेतीतस्करांची हिंमत लक्षात घेता या नालीची सद्य:स्थितीत प्रत्यक्ष पाहणी केली असता ती माती टाकून बुजविण्यात आल्याचे प्रथमदर्शनी आढळून आले. परिसरातील रेतीमाफियांनी परस्पर संगनमताने ही नाली बुजविण्याचा प्रकार केल्याची दबक्या आवाजात पळसगाव परिसरात चर्चा सुरू होती.
नाली बुजविली गेल्यामुळे या मार्गावरून पुन्हा जोमात रेतीचे अवैध उत्खनन व वाहतूक सर्रास सुरू असल्याने शासनाच्या लाखोंचा महसूल बुडत असून, हा महसूल वाचविण्याकरिता संबंधित नाली बुजविणाऱ्यांवर फौजदारी स्वरूपाचे गुन्हे दाखल करून पुन्हा नाली खोदण्यात यावी, असे पळसगाव (को.) येथील सुज्ञ नागरिकांनी माहिती देताना सांगितले.
बाॅक्स
पोलिसांत तक्रार नाही
पळसगाव (को.) शिवारात खोदण्यात आलेले नाली बुजविण्यात आल्याची माहिती महसूल विभागातील कर्मचाऱ्यांना तात्काळ मिळाली.
हा प्रकार कुणी आणि कशासाठी केला याची जाणीवही महसूल विभागातील कर्मचाऱ्यांसह अधिकाऱ्यांना आहे; परंतु या गंभीर प्रकाराबाबत कर्मचारी अथवा अधिकाऱ्यांनी पालांदूर (चौ.) येथील पोलीस ठाण्यात तक्रार नोंदविली नाही.
रेतीतस्कर रेतीचा अवैध उपसा आणि वाहतुकीसाठी राजकीय नेत्यांची मदत घेत असल्याने त्यांच्याविरोधात प्रभावी कारवाई केली जात नाही. ही वस्तुस्थिती आहे.
कोट
‘मोक्यावर पडताळणी करण्याकरिता गेलो असता नाली बुजवली असल्याचे आढळून आले. त्या ठिकाणाहून मोठ्या प्रमाणात रेतीही चोरी गेली असल्याचे दिसले. यासंबंधीचा अहवाल तहसीलदार साहेब लाखणी यांना सविस्तर पाठविलेला आहे.’
-के.बी. मेश्राम, तलाठी, कोलारी (प.)
कोट
रेतीतस्करीमुळे पळसगाव परिसरातील रस्ते पूर्णतः उघडलेले आहेत. नाली खोदल्यामुळे रेतीतस्करीस पुष्कळसा आळा बसला होता. पुन्हा नाली खोदण्यास सर्वतोपरी सहकार्य केले जाईल.
-विलास सार्वे, सरपंच, पळसगाव(को.)