बंदीनंतरही मोहफुलाची आंतरराज्यीय वाहतूक सुरुच

मोहफुलापासून मोठ्या प्रमाणात मद्याची निर्मिती केली जात असतानाही याकडे प्रशासनाचे दुर्लक्ष होत आहे हे विशेष. पशुखाद्याकरिता मोहफुलाची आयात करण्याची परवानगी राज्य शासनाने दिली जाते. वर्षातून आठ महिने मोहफुलाची वाहतूक सुरू राहते.

ठळक मुद्दे१ ऑक्टोबर ते १५ फेब्रुवारीपर्यंत बंदी । मोहफुलाचा मद्य निर्मितीसाठी वापर

लोकमत न्यूज नेटवर्क
तुमसर : मध्यप्रदेश तथा छत्तीसगढ राज्यातून भंडारा जिल्ह्यात बंदी दरम्यान सर्रास मोहफुलाची आयात सुरू आहे. शासन नियमानुसार १ ऑक्टोंबर ते १५ फेब्रुवारी दरम्यान मोहफुल आयातीवर बंदी घालण्यात आली आहे. बंदी असतानाही परराज्यातून मोहफुलाची जिल्ह्यात आयात होत असल्याने यात मोठे अर्थकारण दडल्याची परिसरात र्चा आहे.
मोहफुलापासून मोठ्या प्रमाणात मद्याची निर्मिती केली जात असतानाही याकडे प्रशासनाचे दुर्लक्ष होत आहे हे विशेष.
पशुखाद्याकरिता मोहफुलाची आयात करण्याची परवानगी राज्य शासनाने दिली जाते. वर्षातून आठ महिने मोहफुलाची वाहतूक सुरू राहते. १६ फेब्रुवारी ते ३० सप्टेंबर दरम्यान परप्रांतातील मोहफुल वाहतुकीला परवानगी देण्यात आली आहे. तर १ ऑक्टोबर ते १५ फेब्रुवारी पर्यंत मोहफुल वाहतुकीवर बंदी घालण्यात आली आहे. छत्तीसगढ व मध्यप्रदेश मोहफूल उत्पादन करणारी राज्ये आहेत. जिल्ह्याची सीमा दोन्ही राज्यांना लागून असल्याने मध्यप्रदेशातील बालाघाट, वाराशिवनी, तर छत्तीसगडमधील रायपूर येथून मोहफुलाची वाहतूक जिल्ह्यात केली जाते.

पशुखाद्याच्या नावाखाली मद्यनिर्मीतीसाठी आयात
केवळ पशुखाद्याकरीता मोहफुलाचा उपयोग करण्याचा नियम आहे, परंतु भंडारा व गोंदिया जिल्ह्यात मोठ्या प्रमाणात मोहफुलापासून मद्याची निर्मिती करण्यात येते. मद्य गाळप केंद्र येथे सर्रास सुरू असून पोलिसांचेच त्यांना अभय असल्याने यात अर्थकारण होत असल्याचा आरोप होत आहे. मोहफुल वाहतूकीवर बंदी असताना परराज्यातून वाहतूक कुणाच्या आशिर्वादाने सुरू आहे, असा प्रश्न उपस्थित होत आहे.