दरवर्षी १४ एप्रिल या दिवशी भारतरत्न डॉ. बाबाबसाहेब आंबेडकरांचे अनेक अनुयायी जयंती ठिकठिकाणी साजरी करतात. यावर्षी कोरोनाचा वाढता प्रादुर्भाव टाळण्यासाठी अत्यंत साधेपणाने सकाळी ७ वाजेपासून संध्याकाळी ८ वाजण्यापूर्वी भारतरत्न डॉ. बाबासाहेब आंबेडकर जयंती साजरी करावी, असे ते म्हणाले. दरवर्षीप्रमाणे प्रभात फेरी, बाइक रॅली, मिरवणुका यावेळी जयंतीनिमित्त काढण्यात येऊ नयेत. त्याऐवजी बाबासाहेबांच्या पुतळ्याला अथवा प्रतिमेला पुष्पहार अर्पण करताना त्या ठिकाणी अनुयायांची संख्या एकावेळी पाचपेक्षा जास्त नसावी तसेच तेथे सोशल डिस्टन्सिंगचे व स्वच्छतेच्या सर्व नियमांचे काटेकोरपणे पालन करून जयंती साजरी करण्यात यावी. जयंती साजरी करताना संपूर्ण महाराष्ट्रात विविध कार्यक्रमांचे आयोजन केले जाते. परंतु यावर्षी सार्वजनिक ठिकाणी गाणी, व्याख्याने, पथनाट्य इत्यादीचे सादरीकरण अथवा इतर कोणत्याही सांस्कृतिक कार्यक्रमांचे आयोजन जयंतीनिमित्ताने करण्यात येऊ नये. त्याऐवजी सदर कार्यक्रमाचे केबल नेटवर्कद्वारे अथवा ऑनलाइन प्रक्षेपण उपलब्ध करून देण्याबाबत व्यवस्था करण्यात यावी.
डॉ. बाबासाहेब आंबेडकर जयंतीदिनी आरोग्यविषयक उपक्रम, रक्तदान शिबिरे स्थानिक प्रशासनाच्या पूर्वानुमतीने आयोजित करता येतील. त्याद्वारे कोरोना, मलेरिया, डेंग्यू इत्यादी आजार आणि त्यांचे प्रतिबंधात्मक उपाय तसेच स्वच्छता याबाबत जनजागृती करता येईल, तथापि आरोग्यविषयक उपक्रमांचे आयोजन करताना त्या ठिकाणी सोशल डिस्टन्सिंग तसेच स्वच्छतेचे नियम (मास्क, सॅनिटायझर इत्यादी) पाळण्याकडे विशेष लक्ष देण्यात यावे, असे आवाहन जिल्हाधिकाऱ्यांनी केले आहे.