नववर्ष सुरु होताना सर्वजण आपले राशीभविष्य जाणून घेण्यास उत्सुक असतात. नवीन वर्षात कोणत्या आनंदाच्या गोष्टी घडतील, कोणत्या समस्यांना सामोरे जावे लागेल, याचा अंदाज ज्योतिषशास्त्रातून घेता येऊ शकतो. मेष राशीच्या व्यक्तींसाठी सन २०२२ वर्ष कसे असेल, त्याबाबत जाणून घेऊया...
मेष राशीच्या व्यक्तींसाठी सन २०२२ हे वर्ष संमिश्र स्वरुपाचे ठरू शकेल. वर्षभर आरोग्य, वैवाहिक जीवन आणि करिअरमध्ये सातत्याने चढ-उतार पाहायला मिळू शकतील. मात्र, आर्थिक आघाडीवर मेष राशीच्या व्यक्तींसाठी सन २०२२ ची सुरुवात चांगली ठरेल. जानेवारीच्या महिन्यात मेष राशीच्या व्यक्तींना शुभ परिणाम मिळू शकतात. आर्थिक आघाडीवर चांगल्या परिणामांची अपेक्षा करू शकता. या कालावधीत अचानक धनलाभ होऊ शकतात. पहिल्या तीन महिन्यात खर्चात वाढ होण्याची शक्यता आहे. त्यामुळे अनावश्यक खर्चांवर नियंत्रण ठेवावे, असा सल्ला दिला जात आहे.
एप्रिल महिन्यानंतर नशिबाची उत्तम साथ लाभू शकेल. यामुळे जीवन पद्धती उंचावू शकेल. मे महिन्यात आनंद द्विगुणित करणाऱ्या घटना घडू शकतील. मे आणि जून महिन्याच्या मध्यावर आर्थिक लाभाचे योग जुळून येऊ शकतील. याचा शुभ परिणाम आर्थिक स्थिती मजबूत होण्यात होईल. गुरुच्या राशीबदलानंतर कुटुंबात धार्मिक कार्याचे आयोजन केले जाऊ शकेल.
सन २०२२ मध्ये मेष राशीच्या व्यक्तींनी करिअरकडे विशेष लक्ष देण्याची आवश्यकता आहे. वर्षभरात करिअरच्या क्षेत्रात चढ-उतार पाहायला मिळतील. याचा परिणाम मानसिक ताण-तणावावर होऊ शकतो. एप्रिल महिन्यातील गुरुच्या राशीबदलानंतर परदेशात व्यवसाय करणाऱ्यांना फायदा होऊ शकेल. नोकरीत बदली होण्याची शक्यता आहे. या कालावधीत बऱ्याच काळापासून प्रलंबित असलेली कामे मार्गी लागू शकतात.
सन २०२२ मध्ये मेष राशीच्या व्यक्तींना आरोग्याची विशेष काळजी घेण्याची गरज आहे. आवश्यकता पडल्यास अधिक पैसे खर्च करावे लागू शकतात. मेष राशीच्या प्रेमात असलेल्या व्यक्तींसाठी पहिले तीन महिने काहीसे त्रासदायक ठरू शकतात. जोडीदाराच्या नातेसंबंधात तणाव निर्माण होऊ शकतो. मात्र, जसजसा काळ पुढे सरकेल, तसे सर्व गैरसमज, समस्या दूर होऊन पुन्हा एकदा नातेसंबंध दृढ होऊ शकतील. तसेच वैवाहिक जीवन सामान्य राहील. जोडीदाराचे म्हणणे ऐकून घेणे उपयुक्त ठरेल. वादविवाद शांततेने मिटवण्याचा प्रयत्न करावा. अन्यथा समस्यांना सामोरे जावे लागू शकेल.
मेष राशीच्या विद्यार्थ्यांसाठी सन २०२२ वर्ष उत्तम ठरू शकेल. परदेशात जाऊन शिक्षण घेऊ इच्छिणाऱ्यांसाठी किंवा आताच्या घडीला परदेशात शिक्षण घेत असलेल्यांसाठी एप्रिलनंतरचा काळ फायदेशीर ठरू शकेल. मेष राशीच्या व्यक्ती वर्षाच्या अखेरीपर्यंत आर्थिकदृष्ट्या सक्षम होऊ शकतील. पितृपक्षात चांगली बातमी मिळू शकते. तसेच वडिलोपार्जित संपत्तीत वाढ होण्याची शक्यता आहे.