घाटनांदूर : गुरांना पाणी पाजण्यासाठी नदीवर गेलेल्या युवकास रविवारी जखमी हरीण पाण्यात पडलेले दिसले. युवकाने तत्काळ त्या हरणास उचलून येथील पशू रुग्णालयात उपचार केल्याने त्या हरिणाचे प्राण वाचले. उपचारानंतर हरीण वनविभागाच्या स्वाधीन करण्यात आले.
रविवारी (दि. ४) दुपारी ४ वाजता येथील डोंगर भागातील शेतशिवारात तहानलेले हरीण नदीवर पाण्याच्या शोधात आले होते. त्याच्यावर कुत्र्यांनी हल्ला केला होता. यामुळे ते जखमी अवस्थेत नदीत पडलेले होते. याचवेळी गुरांना पाणी पाजण्यासाठी आलेला विशाल गणपतराव जाधव या युवकास हरीण जखमी झालेले दिसले. आपल्या गुरांना तेथेच बांधून त्याने तात्काळ त्यास उचलून येथील पशू रुग्णालयात आणले. या ठिकाणी डॉ. राजेश्वर बोने, सहाय्यक बबन सोनकांबळे यांनी त्या पाडसावर उपचार करून त्याचे प्राण वाचविले. उपचारानंतर त्या हरणास वनविभागाचे कर्मचारी बाळासाहेब गिते व अक्षय गायकवाड यांना बोलावून घेत त्यांच्याकडे सुपुर्द केले. हरिणाचे प्राण वाचविल्याबद्दल विशाल जाधव याचे वनप्रेमींकडून कौतुक होत आहे.
050721\img-20210704-wa0024.jpg
घाटनांदूर येथील पशुरूग्नालयात जखमी हरणावर उपचार करताना डॉ राजेश्वर बोने,सहाय्यक बबन सोनकांबळे सोबत हरणास आनलेला विशाल जाधव,वन विभागाचे बालासाहेब गित्ते,अक्षय गायकवाड