वैद्यनाथ कारखाना गोदामातील चोरीप्रकरणी आणखी दोघांना अटक

परळी : तालुक्यातील पांगरी येथील वैद्यनाथ सहकारी साखर कारखान्याच्या गोदामातून ३७ लाख रुपये किमतीचे साहित्य चोरी केल्याप्रकरणी परळी ग्रामीण पोलिसांनी आणखी दोन आरोपींना शुक्रवारी अटक केली आहे. या आरोपींमध्ये चोरांच्या टोळीतील एका वाहन चालकाचा समावेश आहे. या चोरी प्रकरणात आतापर्यंत सात आरोपींना अटक झाली आहे.

माजी मंत्री पंकजा मुंडे चेअरमन असलेल्या पांगरी येथील वैद्यनाथ सहकारी कारखान्याच्या गोदामातील ३७ लाख रुपये किमतीचे विविध साहित्य चोरून नेल्याची घटना ऑक्टोबरमध्ये घडली. याप्रकरणी २२ डिसेंबर रोजी परळी ग्रामीण पोलीस ठाण्यात कारखान्याच्या लिपिकाच्या फिर्यादीवरून दाखल गुन्ह्यात परळी ग्रामीण पोलिसांनी तपासाची चक्रे वेगाने फिरवून २४ तासांच्या आत पाच आरोपींना अटक केली. या चोरी प्रकरणाची पोलिसांनी कसून चौकशी सुरू केली असून, आणखी दोन आरोपींना शुक्रवारी अटक केली. त्यांना परळी न्यायालयात हजर केले असता दोघांना २८ डिसेंबरपर्यंत पोलीस कोठडीत ठेवण्याचे आदेश न्यायालयाने दिले. परळी ग्रामीण ठाण्याचे पोलीस निरीक्षक शिवलाल पुर्भे यांच्या मार्गदर्शनाखाली तपास सुरू आहे. चोरी प्रकरणात आणखी आरोपी असण्याची शक्यता असून त्यादृष्टीने तपास चालू आहे व कारखान्यात साहित्य चोरी करणारी ही एक टोळीच असल्याचे पुढे येत आहे. या टोळीचा म्होरक्या मात्र फरार आहे.