वाळू तस्कराची तलाठ्याला दगडाने मारहाण

आष्टी : तालुक्यातील धानोरा येथे विनापरवाना वाळूचा ट्रॅक्टर पकडणाऱ्या मंडळ अधिकारी व तलाठ्याला दगडाने मारहाण करत धमकी देत वाळू तस्कर ट्रॅक्टरसह पळून गेला. शुक्रवारी सकाळी ही घटना घडली. याप्रकरणी तलाठ्याच्या फिर्यादीनुसार २५ जून रोजी अंभोरा पोलीस ठाण्यात गुन्हा दाखल केला आहे.

तालुक्यातील कडा, धानोरा, टाकळसिंग, कानडी, शिराळ, निमगाव चोभा, देविनिमगाव, घोंगडेवाडी तसेच सीना नदीच्या पात्रातून राजरोसपणे विना परवाना वाळू उपसा सुरू आहे. त्यामुळे शासनाचा लाखो रुपयांचा महसूल बुडत आहे. महसूल व पोलीस प्रशासनाचा आष्टी तालुक्यात धाक राहिला नसल्याचे दिसून येत आहे. धानोऱ्याचे मंडळ अधिकारी एस. एन. गवळी व सज्जाचे तलाठी अनिल ठाकरे हे शुक्रवारी सकाळी धानोरा कुंभारवाडी रस्त्यावर थांबले होते. त्यावेळी त्यांना विनाक्रमांकाचा वाळूने भरलेला ट्रॅक्टर आढळून आला. त्यामुळे ट्रॅक्टरचालक नागेश अशोक होळकर यास वाळू परवान्याबाबत चौकशी केली. त्याने परवाना माझ्याकडे नसल्याचे सांगत ट्रॅक्टर पळवून घेऊन जाण्याचा प्रयत्न केला असता, तलाठी अनिल ठाकरे यांनी ट्रॅक्टर अडविला. याचा राग येऊन नागेश होळकरने तलाठी अनिल ठाकरे यांना धमकी देत दगडाने मारहाण केली आणि वाळूच्या ट्रॉलीसह ट्रॅक्टर घेऊन पळून गेला. याप्रकरणी तलाठी अनिल ठाकरे यांनी अंभोरा पोलीस ठाण्यात फिर्याद दिली आहे. पुढील तपास पोलीस उपनिरीक्षक राहुल लोखंडे हे करत आहेत.