रस्त्यालगतचे ढीग वाहतुकीला अडथळा

बीड : माजलगाव तालुक्यातील टाकरवण ते टाकरवण फाटा रस्त्याच्या कडेला टाकलेले खडीचे ढीग वाहतुकीस अडथळा ठरत आहेत. या ढिगाऱ्यामुळे रस्ता अरुंद होऊन अपघात घडू लागले आहेत. एक तर रस्ता दुरुस्त करा किंवा रस्त्याच्या बाजूला टाकलेली खडी उचला, असे म्हणण्याची वेळ आली आहे. ढीग टाकण्यात आले. मात्र, अद्यापही रस्त्याची दुरुस्ती करण्यात आली नाही. रस्ता दुरुस्त करून, ढीग उचलण्याची मागणी आहे.

आरोग्याची काळजी घ्यावी

अंबेजोगाई : सध्या वातावरणात बदल झाल्याने व उन्हाची तीव्रता दिवसेंदिवस वाढत चालल्याने, आजारांचा प्रादुर्भाव वाढत आहे. त्यातच अंबेजोगाई तालुक्यातील कोरोनाच्या वाढत्या संसर्गामुळे अनेक नागरिकांना सर्दी, ताप येणे, मळमळणे, असे विविध आजार जाणवू लागले आहेत. या आजारांपासून बचाव करण्यासाठी डॉक्टरांचा सल्ला घ्या, तसेच कोरोनाची साथ सुरू असल्याने लक्षणे आढळतात. रुग्णालयात जाऊन कोरोनाची तपासणी करा व स्वत:च्या आरोग्याची काळजी घ्या, असे आवाहन केले जात आहे.

रेंज मिळत नसल्याने मोबाइलधारक हैराण

पाटोदा : शहर व परिसरात बीएसएनएलची मोबाइल सेवा सातत्याने विसकळीत होत आहे. समोरच्या व्यक्तीला फोन लावला, तरी रेंज उपलब्ध नसते. जर रेंज उपलब्ध असेल, तर आउट ऑफ कव्हरेज एरिया, असे उत्तर मिळते. अशीच स्थिती इंटरनेट कनेक्शनच्या बाबतीतही झाली आहे. सोशल मीडियाचा वापर करताना मोबाइलमध्ये रेंज दिसते. मात्र, कामकाज होत नाही, अशा स्थितीमुळे मोबाइलधारक हैराण झाले आहेत.