हातभट्ट्यांवर धाडसत्र, पंधरा गुन्ह्यात तीन लाखांचा मुद्देमाल जप्त - A

बीड : राज्य उत्पादन शुल्क विभागाचे हातभट्टी विरोधात धाडसत्र सुरू असून शनिवारी अंबाजोगाई येथील भरारी पथक व औरंगाबाद येथील विभागीय भरारी पथकांनी अंबाजोगाई तालुक्यातील हातभट्टी ठिकाणांवर धाडी टाकून ९४०० लीटर रसायन व १५ लीटर हातभट्टी दारू जप्त केली. या कारवाईत २ लाख ७ हजार ५५० रुपयांचा मुद्देमाल जप्त करण्यात आला.

अंबाजोगाई तालुक्यातील बुटेनाथ दरी परिसरात धाडी टाकून तेथे हातभट्टी दारूची निर्मिती होत असल्याचे दिसून आले. तेथील गावठी दारू तयार करण्यासाठी वापरण्यात येणारे रसायन व तयार हातभट्टीची दारू जागीच नष्ट करण्यात आली. महाराष्ट्र दारूबंदी कायद्यान्वये विभागाकडून ७ बेवारस गुन्हे नोंदविण्यात आले असून आरोपींचा शोध सुरू आहे.

राज्य उत्पादन शुल्क विभागाने २३ जुलै रोजी हॉटेल व धाब्यांची अचानकपणे तपासणी केली असता पाच धाब्यांवर देशी दारू, विदेशी दारू तसेच बिअरचा मुद्देमाल मिळून आल्याने पाच आरोपींविरुद्ध महाराष्ट्र दारूबंदी कायद्यांतर्गत गुन्हा नोंद करण्यात आला. आष्टी तालुक्यातील कडा परिसरात व माजलगाव तालुक्यातील हातभट्टी ठिकाणांवरही धाडी टाकण्यात आल्या. या मोहिमेत ३ हजार लीटर रसायन, १५ लीटर हातभट्टी दारू, १८ लीटर देशी दारू, दहा लीटर विदेशी दारू व पाच लीटर बिअर जप्त करण्यात आली असून शुक्रवारी टाकलेल्या धाडीत एकूण ८० हजार ८०४ रुपयांचा मुद्देमाल जप्त करण्यात आलेला आहे.

राज्य उत्पादन शुल्क विभागाचे आयुक्त कांतीलाल उमाप, औरंगाबादचे विभागीय उपायुक्त प्रदीप पवार यांच्या सूचनेनुसार राज्य उत्पादन शुल्क विभागाचे अधीक्षक नितीन धार्मिक यांच्या मार्गदर्शनाखाली भरारी पथकाचे निरीक्षक, दुय्यम निरीक्षक, विभागीय भरारी पथकातील औरंगाबाद व राज्य उत्पादन शुल्क अंबाजोगाई पथकातील अधिकारी व कर्मचाऱ्यांनी ही कारवाई केली.

हॉटेलवरही कारवाया

दिनांक २३ जुलै रोजी पथकांनी धारूर तालुक्यातील अंबेगव्हाण, बीड तालुक्यातील नाळवंडी शिवार, आष्टी तालुक्यात खडकत, चिंचाळा शिवारातील हॉटेलवर तर कडा येथे सरकारी ओढ्याच्या काठावर छापे टाकून श्रीमंत थोरात, बळीराम गायके, नितीन जेवे, अशोक पोकळे आदींवर कारवाई केली.

240721\273124_2_bed_20_24072021_14.jpeg

कारवाई