माणसं मेली, तक्रारी केल्या, चौकशीही झाली; निकाल मात्र दडपला

सोमनाथ खताळ

बीड : कोरोनात उपचारातील हलगर्जीमुळे रुग्णांचा मृत्यू झाला. रुग्णवाहिकेतून डिझेलची चोरी करून लाखो रुपयांचा अपहार केला. कर्तव्यावर असणाऱ्या नर्सची वॉर्डबॉय छेड काढतो, अशा गंभीर प्रकरणात जिल्हा शल्यचिकित्सकांकडे तक्रारी झाल्या. चौकशीसाठी समित्या नियुक्त केल्या; परंतु अद्याप एकाचाही निकाल न देता ‘अर्थपूर्ण’ दुर्लक्ष करून सर्व प्रकरणे दडपण्यात आल्याचे दिसून येत आहे. जिल्हा रुग्णालयातील या प्रकाराने आता संताप व्यक्त होत आहे. आता या तक्रारींच्या फाईल उघडणार की तशाच दडपून दोषींना पाठीशी घालणार, हे येणारी वेळच ठरविणार आहे.

प्रकरण क्रमांक १

जिल्हा रुग्णालयातील फिवर क्लिनिकमध्ये एका २६ वर्षांच्या मुलाला २४ तास उलटूनही सलाईनही लावले नाही, तसेच बेडही दिला नाही. या मुलाचा व्हरांड्यातच तडफडून मृत्यू झाला होता. या घटनेला जवळपास चार महिने झाले. याबाबत नातेवाइकांनी तक्रार केली; परंतु त्याचा निकाल अद्याप प्रलंबित आहे.

प्रकरण क्रमांक २

कोरोना वॉर्डमधील आयसीयू १ मधील एका नर्सला रात्री २ वाजेच्या सुमारास एका वॉर्डबॉयने आजूबाजूला कोणी नसल्याची संधी पाहून लगट करण्याचा प्रयत्न केला, तसेच तिचे फोटो काढून सोशल मीडियावर व्हायरल करण्याची धमकी दिली होती. याची तक्रारही नर्सने केली आहे. विनयभंगासारख्या या गंभीर प्रकरणातही अद्याप काहीच झालेले नाही.

प्रकरण क्रमांक ३

जननी सुरक्षा योजनेंतर्गत प्रसूती झालेल्या मातांना घरापर्यंत पोहोचविण्यासाठी रुग्णवाहिका आहेत; परंतु चालक व लेखापाल राऊत यांच्या संगनमताने जादा दराची पावती देऊन प्रत्यक्षात कमीच डिझेल टाकून एकावेळी जवळपास १२०० रुपयांची डिझेल चोरी केल्याचे प्रकरण ‘लोकमत’ने पुराव्यानिशी उघड केले होते. यातही राऊत व चालकाला पाठीशी घालून निकाल दडपण्यात आला.

प्रकरण क्रमांक ४

गेवराई तालुक्यातील एका महिलेच्या कोरोना चाचणीचा कसलाही अहवाल नसताना तिला बाधित असल्याचे सांगत नातेवाइकांवर गुन्हा नोंद केला. नातेवाइकांनी डॉक्टर, परिचारिकांसमाेरून मृतदेह नेला होता; परंतु तो पळविला, असे कारण देत अधिकाऱ्यांच्या दबावावरून गुन्हा नोंद झाला. याचीही चौकशी झाली; परंतु त्यातही पुढे काहीच झाले नाही. विशेष म्हणजे याच प्रकरणात मयताचा भाऊ ॲड. कबाडे यांनी याचिका दाखल केली आहे.

उपसंचालकांना बदल्यांमध्येच रस

उपसंचालक डॉ. एकनाथ माले यांना अधिकारी, कर्मचाऱ्यांच्या बदल्यांमध्येच रस आहे. यात मोठी आर्थिक उलाढाल झाली असून, याचे काही पुरावेही हाती लागले आहेत. लातूर कार्यालयातील एका अधिकाऱ्याला हाताशी धरून ‘लाख’मोलाची कमाई होत असल्याने डॉ. माले यांचेही या चौकशींकडे दुर्लक्ष होत आहे. आर्थिक उलाढालीचे हे प्रकरण कागदावर येणार असून, लवकरच याचा पर्दाफाश होणार आहे. डॉ. माले यांची बाजू घेण्यासाठी संपर्क झाला नाही.

कोट

या सर्व प्रकरणांची माहिती घेतली जाईल. सर्व समित्यांना बोलावून याची तपासणी केली जाईल. दोषींवर कारवाई होईलच.

डॉ. सुरेश साबळे, जिल्हा शल्यचिकित्सक, बीड