विरोधकांनी परळीच्या विकासासाठी केंद्रीय सत्तेचा वापर करावा

परळी : विरोधकांनी विकासकामांत राजकारण न करता आपल्या हाती असलेल्या केंद्रीय सत्तेचा आणखी विकासकामे परळीत आणण्यासाठी वापर करावा, असा खोचक सल्लाही पालकमंत्री धनंजय मुंडे यांनी नाव न घेता विरोधकांना दिला.

अनेक वर्षांपासून रखडलेल्या परळी शहर बायपास या रस्त्याच्या चार पदरी डांबरीकरणाचे व परळी ते धर्मापुरी रस्ता रुंदीकरण व मजबुतीकरण कामाचे भूमिपूजन शनिवारी पालकमंत्री मुंडे यांच्याहस्ते झाले. यावेळी ते बोलत होते. या कार्यक्रमास आ. संजय दौंड, जि. प. अध्यक्षा शिवकन्या सिरसाट, नगराध्यक्षा सरोजनी हलगे, जि. प. गटनेते अजय मुंडे, न. प. गटनेते वाल्मिक अण्णा कराड, बाजीराव भैय्या धर्माधिकारी, दीपक देशमुख, शिवाजी सिरसाट, पं. स. सभापती बालाजी मुंडे, सभापती ॲड. गोविंदराव फड, प्रदीप ठोंबरे आदींसह मान्यवर उपस्थित होते.

पालकमंत्री मुंडे म्हणाले, परळी शहर बायपास, परळी ते धर्मापुरी रस्ता या दोन कामांना सुरुवात झाली. ही कामे ८ महिन्यांच्या आतच व तेही अत्यंत दर्जेदार पद्धतीने पूर्ण व्हावे, अशा सूचना पालकमंत्री मुंडे यांनी संबंधित कंत्राटदारांना भाषणाच्यादरम्यान दिल्या. परळी अंबाजोगाई रस्त्याचे काम लवकरच पूर्ण होईल, परळी ते तेलगाव रस्त्याचीही निविदा प्रक्रिया पूर्ण होत आहे. परळी शहर येत्या तीन महिन्यांच्या आत खड्डे व धूळमुक्त करण्यात येईल, असे आश्वासनही त्यांनी दिले.

लातूर, नांदेडच्या धर्तीवर विकास करू

मलकापूर ते वाका या भागातील ११ साठवण तलावांच्या पाणी उपलब्धीचा मार्ग मोकळा झाला असून, या माध्यमातून या भागातील आणखी ३५ % क्षेत्र ओलिताखाली येणार आहे. परळीचा लातूर व नांदेड शहरांच्या धर्तीवर विकास करण्याचे आपले स्वप्न असल्याचे पालकमंत्री मुंडे म्हणाले. सूत्रसंचालन गोविंद केंद्रे यांनी केले. पाहुण्यांचे स्वागत कंत्राटदाराच्यावतीने प्रदीप ठोंबरे यांनी केले.

...तर थर्मलमध्ये सोलरचा प्लांट

थर्मल पॉवर प्लांटमधील काही संच कोळसा व अन्य अडचणींमुळे बंद करण्यात आले आहेत. मात्र आपण ऊर्जा विभागाशी याबाबत चर्चा केली असून, तितक्याच क्षमतेचे सोलर प्लांट उभारण्याचे नियोजन करण्यात येत असल्याचेही मुंडे यांनी यावेळी सांगितले.