आता मोबाईलवर समजणार गंभीर रुग्णांची प्रकृती

बीड : जिल्हा रुग्णालयात उपचार घेणाऱ्या गंभीर रुग्णांची माहिती आता संबंधित डॉक्टरांना मोबाईलवर समजणार आहे. यासाठी वॉर्ड क्रमांक ५ व ६ मध्ये ५० खाटांवर यंत्र कार्यान्वित केले आहेत. रविवारी याला सुरुवातही झाली आहे. आरोग्य विभागाने तंत्रज्ञानाचा आधार घेत कामाचा ताण हलका केला आहे. जिल्हा आरोग्य अधिकारी डॉ. आर. बी. पवार यांनी वॉर्डमध्ये जावून याचा आढावा घेतला.

जिल्हा रुग्णालयात रुग्णांना सुविधा देण्यासाठी यंत्रणा प्रयत्न करत आहेत. डॉक्टरांच्या ड्युटी लिस्ट, सुविधा, उपचार यात सुसुत्रता आणल्यानंतर नातेवाईकांचा वावर कमी करण्यासाठी नर्सिंगच्या विद्यार्थिनींची बेड असिस्टंट म्हणून नियुक्ती करण्यात आली. उपचारातही गतिमानता यावी व डॉक्टरांची धावपळ कमी होऊन गंभीर रुग्णांवर जास्त लक्ष देता यावे, यासाठी तंत्रज्ञानाचा आधार घेण्यात आला आहे. वॉर्ड क्रमांक ५ व ६ मध्ये ५० खाटांवर यंत्र कार्यान्वित केले आहेत. हे यंत्र ऑक्सिजन लेव्हल, रुग्ण गंभीर आहे की नाही आदी माहिती देत आहे तसेच रुग्णांची सर्व माहिती एका क्लिकवर समजणार आहे. यासाठी जवळपास २५ डॉक्टर, नर्सेसला प्रशिक्षण देण्यात आले आहे. ही सर्व माहिती वरिष्ठ सर्वच अधिकाऱ्यांना आपल्या मोबाईलवर समजणार आहे. हा प्रयोग यशस्वी झाल्यानंतर सर्वच खाटांवर ही सुविधा कार्यान्वित करण्यात येणार असल्याचे सांगण्यात आले.

जिल्हाधिकारी रवींद्र जगताप, मुख्य कार्यकारी अधिकारी अजित कुंभार, जिल्हा आरोग्य अधिकारी डॉ. आर. बी. पवार, जिल्हा शल्यचिकीत्सक डॉ. सूर्यकांत गित्ते यांनी यासाठी प्रयत्न केले होते. महाराष्ट्र राज्य इनोव्हेशन सोसायटीचे समन्वयक अमित कोठावळे यांनी बीड आरोग्य विभागाला यात मदत केली आहे.

.....

गंभीर रुग्णांची प्रकृती लवकर समजावी, यासाठी हा प्रयोग सध्या ५० खाटांवर करण्यात आला आहे. मी याची पाहणी केली असून उपक्रम छान आहे. आता आमच्यासह काही ठरावीक डॉक्टरांना आपल्या मोबाईलवर रुग्णांची प्रकृती समजणार आहे. याबाबत सर्वांना प्रशिक्षण देण्यात आले आहे. हा प्रयोग यशस्वी झाल्यास इतर खाटांवरही असे नियोजन केले जाईल. यासाठी अमित कोठावळे यांनी मदत केली.

डॉ. आर. बी. पवार, जिल्हा आरोग्य अधिकारी। बीड.

===Photopath===

300521\30_2_bed_8_30052021_14.jpeg~300521\30_2_bed_7_30052021_14.jpeg

===Caption===

प्रत्येक खाटाला अशाप्रकारे मॉनिटर लावण्यात आले आहेत.~जिल्हा आरोग्य अधिकारी डॉ.आर.बी.पवार यांनी रविवारी सायंकाळी जिल्हा रूग्णालयात जावून खाटांवर कार्यान्वित केलेल्या यंत्राची पाहणी केली.