खासगी रुग्णालयात कोरोना रुग्णांत मोठी घट

पुरुषोत्तम करवा

माजलगाव : तालुक्यात कोरोना रुग्णवाढीचा आलेख मागील ८-१० दिवसांत उतरला असून, खासगी कोविड हॉस्पिटलमध्ये उपचार घेणाऱ्या रुग्णांची संख्या तब्बल ६५ टक्क्यांनी घटली आहे. त्याबरोबरच मृत्युदरही घटला आहे. यामुळे नागरिकांतील चिंता काही प्रमाणात कमी झाली आहे.

माजलगाव तालुक्यात मागील दोन महिन्यांपासून जसजशा कोविड तपासण्या सुरू झाल्या तसतशी रुग्णसंख्या वाढली. त्यात शहरापेक्षा ग्रामीण भागात रुग्णांची संख्या मोठ्या प्रमाणात निघू लागली. यामुळे शहरातील शासकीय एक व खाजगी ८ कोविड हॉस्पिटल व ६ कोविड सेंटर हाऊसफुल्ल होऊन रुग्णांना प्रतीक्षा करण्याची वेळ येत होती. परिणामी, एके दिवशी सर्व ठिकाणच्या रुग्णांची संख्या ६०० पर्यंत पोहोचली. तर सध्या काही खासगी कोविड हॉस्पिटलमध्ये एकही रुग्ण दिसून येत नसल्याचे चित्र दिसत आहे.

येथील देशपांडे हॉस्पिटल व यशवंत कोविड हॉस्पिटलला मागील वर्षापासून मान्यता होती. तर मागील दोन महिन्यांत सहा खाजगी कोविड हॉस्पिटल व एक शासकीय कोविड हॉस्पिटल सुरू केले. अन्य ५-६ ठिकाणीदेखील कोविड सेंटर सुरू करण्यात आले.

माजलगाव ग्रामीण रुग्णालयात शासकीय ३० खाटा व खाजगी कोविड हॉस्पिटलमध्ये ३०० अशा एकूण ३३० खाटांची मान्यता आहे. १५ दिवसांपूर्वी हे सर्व बेड हाऊसफुल्ल होते. मात्र आता रुग्णसंख्या ६५ टक्क्यांनी घटली आहे. सध्या खाजगी कोविड हॉस्पिटलमध्ये १२० रुग्ण उपचार घेत आहेत तर शासकीयमध्ये ३० रुग्ण उपचार घेत आहेत. सर्व ठिकाणी मिळून रुग्णसंख्या १५० च्या आसपास आहे.

शासनाने १९ मेपासून गृह विलगीकरण बंद केल्याने कोविड सेंटरमध्ये सध्या किरकोळ लक्षणे असणाऱ्या ३३५ रुग्णांना डॉक्टरांच्या देखरेखीखाली ठेवण्यात आले आहे.

पहिल्या लाटेपेक्षा दुसऱ्या लाटेत कमी दिवसांत जास्त रुग्णांचा मृत्यू झाला होता. कोरोनाचे रुग्ण वाढीच्या तीव्र काळात मृत्युदरदेखील वाढला. एका दिवसात तब्बल ८-१० मृत्यू झाले होते. मागील दीड महिन्यात १०९ रुग्णांचे मृत्यू झाले. तर मागील दहा दिवसांत १० रुग्णांचा मृत्यू झाल्याचे नगर परिषदेचे कोविड पथकप्रमुख संतोष घाडगे यांनी सांगितले. यामुळे मागील आठ दिवसांत माजलगाव तालुक्यातील मृत्युदरदेखील घटल्याचे चित्र पाहावयास मिळत आहे.

माजलगाव तालुक्यातील रुग्णसंख्या व मृत्युदर या दोन्हींचाही आलेख घटला असला तरी यापुढेदेखील नागरिकांनी कोविड नियमांचे पालन केले तरच आपला तालुका लवकरच शून्य रुग्णसंख्येवर येऊ शकतो.

- डॉ. सुरेश साबळे, वैद्यकीय अधीक्षक, ग्रामीण रुग्णालय.