गावात मुक्कामी राहणारी लालपरी दीड वर्षापासून स्थानकातच उभी

बीड : काेरोनाच्या धक्क्यातून राज्य परिवहन महामंडळ अद्यापही बाहेर पडलेले नाही. ग्रामीण भागातील गावांमध्ये ७४ बस मुक्कामी थांबत होत्या. यातील केवळ ३१ चालू असून तब्बल ४३ बस मागील दीड वर्षापासून बसस्थानकातच उभ्या आहेत. शहरांतील बससेवा सुरळीत होत असली तरी ग्रामीण प्रवाशांना अद्यापही खासगी वाहनांचाच आधार घ्यावा लागत आहे.

जिल्ह्यात आठ आगार आहेत. प्रत्येक आगारातून ग्रामीण भागातील प्रवाशांसाठी बस सोडल्या जातात. तसेच ज्या गावातून अथवा मार्गावर प्रवासी संख्या अधिक आहे, अशा ठिकाणी बस मुक्कामी पाठविल्या जातात; परंतु मागील दीड वर्षापासून लालपरीची चाके कोरोनामुळे रुतलेलीच आहेत. काही दिवसांपूर्वी बस रस्त्यावर दिसू लागल्या असल्या तरी ग्रामीण मार्गावर धावणाऱ्या बसची संख्या तुटपुंजी आहे. त्यामुळे ग्रामीण प्रवाशांना आजही पायपीट अथवा खासगी वाहनांचा आधार घ्यावा लागत आहे. यात त्यांची आर्थिक लूट होत असून अपघाताची शक्यताही वर्तविली जात आहे. हे सर्व टाळण्यासाठी रापमने योग्य नियोजन करून ग्रामीण भागात बससेवा सुरू करावी, अशी मागणी होत आहे.

ग्रामीण भागात अवैध प्रवासी वाहतूक

बससेवा बंद असल्याने ग्रामीण प्रवाशांना रिक्षा, जीप आदी खाजगी वाहनांचा आधार घ्यावा लागत आहे. हे वाहनधारक क्षमतेपेक्षा जास्त प्रवासी बसवत असल्याने अपघाताचा धोका होण्याची शक्यता वर्तविली जात आहे.

शाळा बंद असल्याचाही फटका

शाळा बंद असल्याने मानव विकासच्या बसही इतर मार्गावर धावत आहेत. शाळा सुरू झाल्यास परिवर्तनसह मानविकास, शिवशाही बसमध्ये बसणाऱ्या प्रवाशांची संख्या वाढेल. याचा फायदा रापम व प्रवाशांना होणार आहे.

---

ग्रामीण भागात कोरोना अगोदर ७४ बस धावत होत्या. सद्यस्थितीत ३१ बस मुक्कामी थांबत आहेत. टप्प्याटप्प्याने बस वाढविल्या जात आहेत. शाळा बंद असल्याचा परिणाम होत आहे.

एस.बी.पडवळ, वाहतूक अधिकारी रापम बीड

---

अशी आहे आकडेवारी

आगार पूर्वीआता

बीड १५ ८

परळी ११ ५

धारूर ५२

माजलगाव८४

गेवराई ७३

पाटोदा ८१

आष्टी १२ ३

अंबाजोगाई८५

एकूण ७४ ३१