पेट्रोल-डिझेलच्या दराने किचन कोलमडले; किराणा, भाजीपाला महागला!

बीड : इंधन दराचा भडका दिवसेंदिवस वाढतच असल्याने सर्वसामान्यांच्या जीवनमानावर विपरित परिणाम होत आहे. कोरोनामुळे विविध समस्यांचा सामना नागरिकांना करावा लागत आहे. यातच मागील काही महिन्यांपासून पेट्रोल आणि डिझेलचे दर वाढल्यामुळे वाहतूक दरात वाढ झाली, परिणामी जीवनावश्यक वस्तूंच्या किमतीमध्ये मोठ्या प्रमाणात वाढ झाली. खाद्यतेलाच्या दराने विक्रमी उच्चांक गाठला. १७५ रुपये लिटरपर्यंत तेलाचे भाव झाले. किराणा, भाजीपाला महाग झाल्याने सर्वसामान्यांचे बजेट कोलमडले आहे.

डिझेल दरवाढ होताच त्याचे प्रत्यक्ष-अप्रत्यक्ष परिणाम सामान्यांना भोगावे लागत आहेत. कोरोना लॉकडाऊनकाळात जीवनावश्यक वस्तूंच्या किमतीत होत असलेली वाढ सामान्य जनतेने नाईलाजाने पचविली असली, तरी कुटुंबाचे किचन बजेट बिघडलेले आहे. एकीकडे ही परिस्थिती असताना, दुसरीकडे फळे आणि भाज्याही महाग झाल्या आहेत. मागील वर्षभरात डिझेलच्या दरात लिटरमागे १२ ते १५ रुपयांची, तर तर पेट्रोलच्या दरात २५ रुपयांची वाढ झाली. इंधनात ३५ ते ४० टक्के दरवाढ झाल्याने बाजारातील जीवनावश्यक वस्तूंच्या किमतीवर त्याचा परिणाम झाला आहे. यातच गॅस सिलिंडरचा प्रवास हजारीच्या दिशेने चालला आहे. वर्षभरात गॅस २०० रुपयांनी महाग झाला आहे.

असे वाढले पेट्रोल-डिझेलचे दर

पेट्रोल

जानेवारी २०१८ -- ८०

जानेवारी २०१९ -- ८१

जानेवारी २०२० -८२

जानेवारी २०२१ -९२

फेब्रुवारी - ९७.३४

मार्च - ९७.२०

एप्रिल -९७.६०

मे - १००.१९

जून - १०३

जुलै - १०६.५८

डिझेल

जानेवारी २०१८- ६९

जानेवारी २०१९ -६७

जानेवारी २०२० -७२

जानेवारी २०२१ - ८४

फेब्रुवारी - ८८.४४

मार्च - ८६.१०

एप्रिल -८७.१०

मे - ९२.१७

जून -९६.००

जुलै - ९६.७२

शेवगा, दोडका ८० रुपये किलो

उन्हाळ्यात ३० ते ४० रुपये किलोपर्यंत भाज्या खरेदी करता आल्याने सामान्यांना दिलासा मिळाला होता. मात्र जूनपासून पावसामुळे बाजारात भाज्यांची आवक कमी होत आहे. शेवगा, दोडका ८० रुपये किलो आहे. फ्लॉवर, पत्ताकोबी, वांगी, भेंडी पन्नास ते साठ रुपये किलोने विकली जात आहे. एरवी दोन रुपयाला मिळणारी कोथिंबीर, पालेभाज्यांची जुडी पाच रुपयांना एक याप्रमाणे मिळत आहे.

शेवगा ८०

दोडका ८०

कांदे ३०

बटाटे २०

टोमॅटो २० रुपये किलो

डाळ स्वस्त, तेल महाग

बाजारात डाळींचे भाव कमी झाले आहेत. चणा डाळीचे दर किलोमागे १३ ते १५ रुपयांनी उतरल्याने ६० रुपये आहेत. ११० ची तूरडाळही ९० ते ९५ रुपये किलो झाली. उडीद, मूग डाळीतही किलाेमागे १० ते १२ रुपयांची घसरण झाली आहे, तर सोयाबीन तेल १६० चे १४५ रुपये लिटर, तर सूर्यफूल तेल १८५ चे १६५ रुपये लिटर झाले असले तरी महागच आहे. पाम तेल व शेंगदाणा तेलाच्या दरात लिटरमागे १० रुपयांनी वाढ झाली आहे.

ट्रॅक्टरची मशागतही महाग

बैल बारदाना कमी झाल्याने शेतीकामे ट्रॅक्टरने करण्यावर भर दिला जात आहे. हे प्रमाण ९० टक्के इतके आहे. नांगरटीला एकरी २५००, तर एक बॅग पेरणीला व रूटरला प्रत्येकी एक हजाराचा भाव आहे. डिझेलचे दर वाढल्याने ट्रॅक्टरने शेती महाग झाली आहे.

--

घर चालविणे झाले कठीण

तेल खूप महाग झाले आहे. भाज्यांना फोडणी देताना फार विचार करता येत नाही. कोरोनामुळे आधीच उत्पन्न कमी आणि खर्च वाढला आहे. यातच जीवनावश्यक वस्तूंच्या किमती गगनाला भिडल्या आहेत. गॅस सिलिंडरला ८८० रुपये मोजावे लागत आहेत. घर चालविणे कठीण झाले आहे. - सुशिला किशोर गायकवाड, बीड.

---------

महागाईने सर्वसामान्य कुटुंबाचे कंबरडे मोडले आहे. रोजच्या गरजा भागवताना अडचणी येत आहेत. तेल १७० रुपये, गॅस सिलिंडर ९०० रुपयांपर्यंत गेला आहे. डाळी महाग झाल्या आहेत. दैनंदिन आर्थिक अडचणीत वाढ झाली आहे. सर्व बाबी जिथल्या तिथे कराव्या लागत असल्याने यावर पर्यायदेखील काढता येत नाही. - मोहिनी दीपक सर्वज्ञ, बीड.

---------

तेलाचे भाव मागील कही दिवसांत १० ते १५ रुपयांनी उतरले आहेत. डाळीचे दरही काहीसे तुटले आहेत. डिझेल दरवाढीमुळे वाहतूक खर्च वाढल्याने परराज्यातून येणाऱ्या मालाच्या दरात वाढ झाली आहे. सध्या लागते तेवढेच खरेदी करण्यावर ग्राहकांचा भर आहे. - गंगाबिशन करवा, किराणा व्यापारी, बीड.

-------------

स्थानिक शेतकऱ्यांकडून मोजक्याच भाज्या बाजारात येत आहेत. फळभाज्या इतर जिल्ह्यातून मागवाव्या लागत आहेत. त्यामुळे वाहतूक दराचा परिणाम होतो. डिझेल महाग झाल्याने वाहतूक दरातही वाढ झाली. आपोआप भाज्यांचे भाव कमालीचे वाढले आहे. ग्राहकही कमी असल्याने आवकही कमी आहे. - हुजेब बागवान, भाजी विक्रेता, बीड.

---------